Fara í efni

BANKAREIKNINGUR OKKAR HJÓNANNA ER 517-26-1296

Eins og ég á kyn til lifna ég allur við þegar peningar í eigin vasa eru annars vegar. Mig langar því að leggja örfá orð í belg undir lok kosningabaráttunnar og einkum vegna þeirra tilboða sem Björn Ingi Hrafnsson og hans ágæta exbé-framboð hefur gert mér og minni fjölskyldu í einföldum skiptum fyrir atkvæði.

Fyrst vil ég víkja að því rausnarlega tilboði að senda okkur hjónunum 500 þúsund krónur eftir söluna á hlut borgarinnar í Landsvirkjun. Það er auðvitað engin spurning að svona pólitík kann ég að meta, kannast reyndar aðeins við hana úr pússi Péturs frænda míns Blöndals en honum, þeirri stærstu sparigrís ættarinnar, mundi ég ekki einu sinni treysta fyrir 5 aurum enda hefur ekkert skilað sér úr þeirri áttinni. Við hjónin erum hins vegar á því að Björn Ingi Hrafnsson sé traustsins verður. Við höfum bara áhyggjur af því hvort Skatturinn verði nokkuð með nefið ofan í þessum ágætu eingreiðslum og þá með hvaða hætti því auðvitað yrðu óeðlileg afskipti frá þeim bænum til nokkurrar skerðingar fallin. Verður hlutur okkar hjónanna kannski tekinn til skattalegrar meðferðar sem gjöf, arðgreiðsla, styrkur eða eitthvað allt annað? Undan svona nokkru getur athafnastjórnmálamaðurinn Björn Ingi auðvitað skotist á auðveldan hátt, t.d. með stofnun á skattfrjálsu happdrætti sem myndað yrði í kringum okkar ágæta Landsvirkjunar-hlut.

Og þá að öðrum tilboðum. Tillögur exbé um frístundakort og greiðslur til foreldra barna á aldrinum 9-18 mánaða eru að sjálfsögðu brilljant en tvennt truflar okkur hjónin þó; fyrir það fyrsta og enn og aftur skattaleg meðferð á þessum greiðslum og eins hvort greiðslurnar verði ekki örugglega afturvirkar eins og Björn Ingi gaf raunar sterklega loforð um á fundi með okkur gamla fólkinu í tómstundaheimili okkar, í Skógarbæ, á dögunum. Við hjónin eigum 8 uppkomin börn sem öll voru heima á aldrinum 9-18 mánaða og sem öll voru á bólakafi í íþróttastarfi KR frá 5-16 ára aldri.

Þegar öllu er til skila haldið reiknast mér því til að skuld borgarinnar við okkur hjónin sé svohljóðandi, sundurliðuð:

Eingreiðslur vegna sölu á hlut okkar í Landsvirkjun, samtals kr. 500 þúsund, uppsafnaðar frístundakortagreiðslur vegna okkar yndislegu og uppkomnu barna, þrjár milljónir átta hundruð og fjörutíu þúsund, og loks greiðslur vegna heimagæslu sömu barna á aldrinum 9-18 mánaða, þrjár milljónir og sexhundruð þúsund. Þetta gera samtals sjö milljónir og 940 þúsund krónum betur. Sameiginlegt reikningsnúmer okkar hjónanna er 517-26-1296. Greiðslu skuldarinnar má Björn Ingi allt eins inna af hendi í tvennu lagi, ef þannig stendur á, en þó þannig að helmingurinn verði kominn inn á reikninginn fyrir lokun banka og sparisjóða næstkomandi föstudag. Þá förum við á kjörstað á laugardaginn og kjósum rétt –  því auðurinn er jú afl þeirra hluta sem gjöra skal - en greiðsla á eftirstöðvunum má alveg bíða fram að útborgunardegi um n.k mánaðamót.
Með hjartans kveðju,
Jón Bissnes