STÓRIÐJUVANDI ÖSSURAR - HVÍ KENNA ÖÐRUM UM?

Velkominn í hópinn Össur.
Össur stóriðjuráðherra hefur nú stimplað sig í hóp óbreyttra sem koma skoðunum sínum á framfæri á þessari síðu. Býð ég hann velkominn í hópinn og vona að hann nái sem fyrst fyrri flughæð en nú liggur hann sem kunnugt er límdur við ál-egg Framsóknar í Látrabjargi Íhaldsins. Það hlutskipti fer honum ekki vel og ljóst að vanlíðanin undan ísköldum eggjunum er mikil; vanlíðan sem hann vill ekki viðurkenna hvers vegna til er komin og reynir því af veikum mætti að benda á aðrar orsakir, kenna einhverju öðru um. Og hann hefur valið þá ótrúlegu leið, karlgreyið, að skella skuldinni á Vinstri græn.

Þetta minnir mig aðeins á þá sem áttu við geðsjúkdóma að glíma fyrr á tíð og voru ofurseldir eigin fordómum og annarra. Þessir sjúklingar komust gjarnan inn á spítala á fölskum forsendum. Fyrst voru þeir með áþreifanlegan og almennilegan sjúkdóm. Þeir voru slæmir í maga, "háttvirtir magasjúklingar" sem voru með líkamleg álagseinkenni. En það var ekkert hægt að gera fyrir þessa sjúklinga,ekki einu sinni hrærð egg eða flóuð mjólk sló á allra verstu einkennin. Þeir voru því fluttir á milli deilda þar til þeir komust á endanum á þá réttu. Og þetta mun auðvitað gerast með hann Össur okkar í hans stóriðju-vandamálum - og því fyrr, því betra.
Össur á nefnilega heima í samstarfi með VG en ekki sem vandlætari og hirtingarmaður þess flokks. Það veit hann sjálfur. Getur verið að samviskubit skýri skrif og viðbrögð? Kannski svoldið óbragð í munni?

Með góðri kveðju og ósk um skjótan bata,

Þjóðólfur.

Fréttabréf