SAMIÐ UM ÓLÖGMÆTAR KRÖFUR

Sæll Ögmundur.
Sem heiðarlegum villiketti blöskrar mér rjómalapsliðið, sem ver klíkur sínar falli, því það óttast lýðræðið. Félagi Ögmundur, þér sem dómsmálaráðherra tilkynni ég því hér með um meint, alvarlegt afbrot formanns þíns og vísa þar til snaggaralegra ásakana Sveins nokkurs Valfells, sem fram hafa komið á hendur fimmfalda simmsalabimm ráðherranum og formanni þínum og húsbónda (?), Steingrími Jóhanni Sigfússyni. Málið varðar Icesave gjörninga Svavars Gestssonar, flokksfélaga þíns og ætti að vera þér vel kunnugt, enda vékstu þá úr ríkisstjórn og þvoðir hendur þínar, en síðan hefur þú, beint og óbeint, haldið hlífiskildi yfir þessum meintu glæpamönnum, þeim Steingrími og Svavari. Það er grafalvarlegt mál, hr. dómsmálaráðherra.
Um hinar snaggaralegu ásakanir Sveins er fjallað á eyjunni.is og þar segir ma. að skýrt sé tekið fram: "...í tilskipun ESB um innistæðutryggingar að þjóðríki skuli ekki bera ábyrgð gagnvart innistæðueigendum hafi þau innleitt tryggingakerfi. Fram komi í skýrslu Rannsóknarnefndar Alþingis að innistæðutryggingakerfi á Íslandi var með svipuðum hætti og í mörgum öðrum Evrópulöndum, jafnvel betra en í sumum. Rannsóknarnefndin sé ennfremur þeirrar skoðunar að Ísland hafi framfylgt tilskipun ESB um innistæðutryggingar. Í stað þess að reyna verja hagsmuni ríkissjóðs af krafti skipaði þáverandi fjármálaráðherra, Steingrímur J. Sigfússon, samherja í pólitík til forystu sendinefndar sem semja átti við Bretland og Holland. Svavar Gestsson var fenginn til að semja um ólögmætar kröfur upp á mörg hundruð milljarða, liðlega þriðjung þjóðarframleiðslu, en hafði enga reynslu eða menntun til starfans. Niðurstaðan var stórkostlegt klúður. Ef ráðherra skipar vanhæfan mann ótengdan sér að semja í þýðingarmiklu máli, það eru stórkostleg afglöp. Að útvega flokksfélaga bitling hjá ríkinu er þjófnaður af almannafé. Í lögum um ráðherraábyrgð segir skýrt að krefja megi ábyrgðar ráðherra sem "af ásetningi eða stórkostlegu hirðuleysi" stofni hagsmunum ríkisins í fyrirsjáanlega hættu. Það segir Sveinn að Steingrímur J. Sigfússon hafi gert þegar hann lagði ríkissjóð að veði vegna Icesave. Ennfremur segir í 91. grein íslenskra hegningarlaga: "[Fangelsi allt að 16 árum] skal enn fremur hver sá sæta, sem falið hefur verið á hendur af íslenska ríkinu að semja eða gera út um eitthvað við annað ríki, ef hann ber fyrir borð hag íslenska ríkisins í þeim erindrekstri." Ekki verður annað séð en að Svavar Gestsson og Steingrímur J. Sigfússon hafi báðir brotið þessa grein, Svavar með frammistöðu sinni í samningum við Breta og Hollendinga og Steingrímur með því að leggja klúður Svavars fyrir þingið. Greinilegt er af því sem opinberlega er vitað um þetta eina mál, Icesave, að Steingrímur J. Sigfússon verðskuldar að vera ákærður fyrir Landsdóm."
Hverju vill hæstvirtur dómsmálaráðherra svara þessum alvarlegu ásökunum? Ég, sem óbreyttur og heiðarlegur villiköttur krefst greinargóðra svara frá þér Ögmundur Jónasson. Gilda hér bara landslög fyrir aumingjana, Les miserables, en simmsalabimm ráðherrar megi fimbulfamba og veðsetja þjóðina beinustu leið til helvítis, án þess að dómsmálaráðherrann rumski í rekkjutjöldunum og plussi hirðarinnar?
Villikötturinn

Fréttabréf