KOSNINGAR NÁLGAST

Heill og sæll Ögmundur.
Nú ert þú í vel þolanlega góðu stuði kallinn minn í þessu Nú-bó skúffumáli Steingríms J. og Jóhönnu, hinna "miklu" formanna "vinstri velferðarinnar". Ég, einn fjölmargra Les miserables hér á þessu gósenlandi okkar, sé eftir þér höfð þessi spaklega mældu orð: "En þá eru önnur lög við lýði sem heita lög um ívilnanir vegna nýfjárfestinga á Íslandi, frá því í júní 2010. Þar er kveðið á um að hægt sé að veita undanþágu frá hinum almennu lögum. Það var gert af hálfu ríkisstjórnarinnar 12. júní sl. Með þeim var Kínverjunum heimilað að stofna félag hér á landi sem verður ígildi íslensks fyrirtækis."
Nú leyfi ég mér að spyrja þig elsku kúturinn minn, hvort þú viljir ekki upplýsa allan almenning hvaða ráðherrar samþykktu þessa ívilnun og með hvaða hætti og hvort skúffan sé falin hjá þínum VG formanni, Steingrími J.? Ég veit að þú, Ögmundur minn, mótmæltir ákvörðun ríkisstjórnarinnar. En hin iskalda staðreynd er eftir sem áður sú, að Ríkisstjórn Jóhönnu Sigurðardóttur og Steingríms J. hefur gengið í þessu máli sem mörgum öðrum, markvisst gegn hagsmunum þjóðarinnar. Hins vegar vita það allir að þú, eini ráðherrann með viti í "vinstri velferðarstjórninni", Ögmundur minn Jónasson hefur vissulega reynt þitt besta til að verja hagsmuni þjóðarinnar, það verður aldrei frá þér tekið. En ég, Jón Jón Jónsson, hvet þig nú eindregið til að viðurkenna hina stóru staðreynd, sem Lilja Mósesdóttir segir um þetta mál á facebook status á heimasíðu sinni, liljam.is, að: "VG-liðar verða að fara að átta sig á því að ríkisistjórnin hefur ekki aðeins grafið undan félagshyggju með niðurskurði á grunnstoðum velferðarkerfisins heldur ræðst hún ítrekað gegn þjóðarhagsmunum."
VG er kasúldið vörumerki Ögmundur minn. Fólk hryllir sig þegar það sér vörumerkið VG. Það er staðreynd og kominn tími til að þú fattir það, elsku kúturinn minn. Tíminn líður nú hraðar og hraðar í áttina að kosningum Ögmundur minn. Vilt þú þá vera í kasúldnu liði með Steingrími J. og snötum hans Birni Val og Árna Þór?
Nei, fjandakornið, enda átt Þú betra skilið Ögmundur minn og þú veist að okkar bíður nú SAMSTAÐA, til lýðræðis og velferðar ... okkar allra, til varðveislu þjóðarhagsmuna og til þjóðarhagsbóta fyrir okkur öll.
Jón Jón Jónsson

Fréttabréf