UM ÖRYGGISMÁL OG MENGUNARVANDA

Nú opinberast í bandarískri leyniskýrslu viðurkenning á þeirri augljósu staðreynd að stríðið í Írak hafi aukið hryðjuverkahættuna. Tveir mestu óhappamenn Íslands í allri kristni þeirrar þjóðar samanlagðri tóku upp á sitt eindæmi ákvörðun um að styðja þessa innrás. Með hefðbundnu orðalagi og skiljanlegu gáfu þessir svarabræður hættulegustu öfgasamtökum heimsins óformlegt veiðileyfi á íslenska þegna heiman sem heima. Sporgöngumenn Björns í Mörk sem greinilega nýtur ekki sannmælis í þjóðarsálinni.

Nú er í bígerð mikil löggerð til öryggis borgurum þessa lands undir handleiðslu Björns nokkurs, sonar Bjarna þess sem sagt er að aldrei hafi lagst til svefns nema gæta þess vandlega áður að ekki lægi undir rúminu flugumaður kommúnista. Öryggi þjóðarinnar verður best treyst með því að Ísland verði vettvangur sáttaumleitana án stuðnings við ofbeldi hvort sem er til sóknar eða varnar. Metnaður okkar á að liggja í því að fá stuðning alþjóðasamfélagsins til að reisa hér á Íslandi ráðstefnuhús yfir friðar-og öryggisviðræður; og jafnframt ætti þarna að vera mistöð vísindalegra rannsókna á tengingu loftslagsbreytinga og mengunarlosunar.

Það er einnig brýnt að benda á það að sala vistvænnar orku er engin lausn á mengunarvanda. Framleiðsla á málmum undir þeim formerkjum er aðeins aukning við aðra framleiðslu en það er fyrst og fremst sóunin sem þarf að stöðva áður en gripið er til þess að bjóða vistvæna orku á verðlagi uppdópaðra portkvenna. 

Nú verður það að vera skýlaus krafa allrar stjórnarandstöðunnar að Ísland segi sig frá öllum stuðningi við þetta glórulausa einkastríð bandarískra olíuauiðhringa sem tveir vanburða aular tóku ábyrgð á fyrir hönd okkar þjóðar sem aldrei var spurð. Og vel má það vera að morgunspjall þeirra G.W.Bush og Drottins allsherjar sé athyglisvert áheyrnar. Fyrir það gef ég hinsvegar ekki mikið á meðan sá fyrrnefndi túlkar það einhliða án ritskoðunar. 

Kveðja,

Árni Gunnarsson frá Reykjum