Fara í efni

RÍKIS-STJÓRNIN VEÐSETUR BÖRNIN OG FRAMTÍÐINA

Á yfirstandandi bulltímum um ,,þjóðarsamstöðu"gengur nú ríkisstjórnin með betlistaf að lánasnapi þannig að skuldsetja megi hvert íslenskt heimili um tugi milljóna. Aðeins eitt stórlánið sem fer strax til skuldagreiðslu, þetta frá Alþjóðabankanum og Norðurlöndunum leggur sig á 16 milljónir á hvert íslenskt heimili segir Viðskiptablaðið. Nú á ríkið að skrá sig að auki fyrir hundraða milljarða skuld við breska ríkið vegna Landsbanka-glæpanna. Áfram verður  strokkað  því mörg önnur Evrópuríki undirbúa álíka kröfugerð. Glitnis-hyskið sætir nú lögreglurannsókn vegna milljarða-þjófnaða í Noregi.-
Krimmarnir eru í felum en íslensk börn og framtíðin er veðsett vegna afbrotanna. Örvæntingarfullir ráðherrar eru nú í samningagerð um ríkisútgjöld sem nema margföldum þjóðartekjum Íslands, svo ekki sé minnst á upphæðir fjárlaga.
Lánskuldbindingar svara auðvitað til útgjalda !
Allt þetta ferli er sönnun á að ráðmenn Íslands telja sig meðseka og ábyrga fyrir þeim efnahags-landráðum,sem framin hafa verið undanfarin ár. Allt taut Geirs Haarde um frábæra stöðu ríkissjóðs ber vott um ófyrirgefnalegar blekkingar. Málið snýst ekki einungis um kunna ágalla kapítalisma og nýfrjálshyggju. Þetta er afbrotamál sem snýst um stórþjófnaði, peningaþvætti, skjalafals, bókhaldssvik, ótrúlega fjárglæfra.
Alþjóðalánsfjárkreppan afhjúpaði svindlið en hún er auðvitað ekki orsakavaldur þess. Glæpa-kerfið var séríslensk uppfinning, stutt af íslenskum stjórnvöldum. Nú er heilt ár liðið síðan ljóst var að glæpakerfið var í raun hrunið !
Í þessu Írafári er varla minnst á Alþingi Íslendinga.
Það tók sér laaangt frí sl. vor og er nýmætt til þeirra daglegu starfa að þusa um smámálin á meðan skipið sekkur. Engum virðist detta í hug lengur að Alþingi sé lýðræðisvettvangur og að til þess eigi að gera kröfur. Á meðan situr ráðherravaldið og skrifar upp á stjarnfræðilega framtíðarvíxla !
 Baldur Andrésson