Sigurbergur Árnason skrifar: ÍRAK NORÐURSINS

Tímasprengja kapítalismans er sprungin í Írak norðursins. Og drunurnar bergmála um almanakið, vikur, mánuði og ár. Heimatilbúin sjálfsmorðsklasasprengja, sprakk inní þjóðarsálina, særði stolt hennar og braut efnahagslega sjálfsvirðingu í mél í beinni útsendingu á flatskjá fjölmiðlafrelsisins. Krónan er komin í neyðarmóttöku fyrir þolendur efnahagsafbrota, niðurlægð og svívirt með brotna sjálfsmynd og bíður eftir dollaraplástri. Ríkisstjórn frjálshyggjunnar, vitorðsmenn spillingar og valdníðslu, með krónískt gróðapungsig, sat við veisluborð upptekin við að hygla sjálfri sér, bestu vinum sínum og skyldmennum þegar óafturkræft voðaverkið var vandlega undirbúið árum saman og framið í skjóli nætur. Fnykurinn af daunillum Hólmfret frjálshyggjunnar, hættulegasta efnavopni nútímans, sem fannst ekki í Írak, þrátt fyrir ítarlega leit, er á Íslandi og veldur klígju, ógleði og kvalafullum dauða í hægðatregðu hagkerfisins. Handrukkarar ríkisvaldsins, með áttatíu milljarða sakaruppgjöf eru risnir upp frá dauðum, úthlutandi veðköllum á færibandi sjálftekjunnar, snuðrandi kringum ryðgað dánarbúið, nýkomnir úr hundahreinsun fjármálaeftirlitsins. Hin staðfasta þjóð horfir ringluð til vestrænna vina sinna, með allt niðrum sig og þjóðhagslegt dimmviðri heilsuspillandi braggahverfa viðreisnarinnar stígur uppúr skotgröfunum, sem heimilin eru byrjuð að grafa ofan í skuldirnar, sem ókomnar kynslóðir hafa ekki pantað með aukaáleggi. Selskinnskápuklæddir valdhafar, bíða eftir tveimur fjörutíu feta gámum fullum af dollaraseðlum og slá skjaldborg um sjálfa sig og fjölga um tvöhundruð og fimmtíu í lýðveldisverðinum til að veðsetja fólkið sem er byrjað að efast um tilverurétt sinn og sér fylgjur Intrum & Co. snuðrandi í heimkeyrslunum eins og hýenur.
Nú er fátt til úrræðis en að strjúka rykið af fornaldarfrægðinni, sem var lokuð inni í sprengiheldum bókhlöðum og rifja upp hvað það var sem gerði okkur að þjóð fyrir meira en þúsund árum í stað þess að láta gerspillta og fávísa valdhafa kúga okkur í hraðferð til glötunar.

Fréttabréf