Baldur Andrésson skrifar: VOPNIN KVÖDD

Landhelgisgæslan hefur, með vitund ríkislögreglustjóra, verið staðin að umfangsmiklu vopnasmygli til landsins. MP5 vélbyssur í hundraðatali og ókjör skotfæra voru með leynd færð til landsins fyrir mörgum mánuðum síðan. Þessi smyglvarningur var vandlega falinn í gamalli vopnageymslu á  Suðurnesjum. Geymslusvæðið er sannarlega í íslenskri lögsögu. Um felustað óskráðu vopnanna gilda engin sérlög Íslandi.

Brotavilji vopnasmyglaranna virðist hafa verið einbeittur. Ekkert er ennþá upplýst um smyglaðferðina, t.d. með hvaða hætti vígtólin  bárust til landsins. Sagt er þó að viðkomandi ráðherrar, ríkisstjórn og Alþingi voru algerlega hlunnfarin um upplýsingar.

MP5 vélbyssur eru allöflug vígtól. Þau eru ætluð framavarðasveitum herja og sérþjálfuðum víkingasveitum lögreglu. Af þessum vígtólum má hleypa allt að 800 skotum á mínútu að sögn þýsku vopnaframleiðendanna. Ekkert er þó fast í hendi varðandi upplýsingar vopnasmyglara um áætluð not þeirra af a.mk. 250 vígtólum þessarar gerðar á Íslandi. Um virðist vera að ræða áætlun um mikla stigbreytingu eða leynilega eðlisbreytingu á vopnavæðingu íslenskrar valdstjórnar. Getgátur einar gilda þó ennþá um eðli og tilgang vopnabrasksins. Leiðir vopnavina telja þeir óannsakanlegar.

 Ein spurningin er, hvar finna á mannskap til að sitja undir þessum ókjörum af vígtólum.

Á að vekja upp gamlan draum um þjóðvarðlið sérvalinna sjálfboðaliða ? Á að stofna til vopnaðar öryggissveita í einkaeigu ? Á að vígbúa almenna lögreglumenn á Íslandi, færa í hendur þeirra öflug sérsveitarvopn ? Á að senda íslenska menn til NATÓ stríða hér og þar um veröldina ? Hugarheimur vopnasmyglara er ráðgáta. Framtíðarplönin dularfull.

Tollayfirvöld hafa nú lagt hendur sínar á þennan hættulega smyglvarning á Suðurnesjum, innsiglað felustaðinn og meinað vopnasmyglurum aðgang að vígtólunum. Tilefnið er að lög um vöruinnflutning hafa smyglarar þverbrotið, en brotaviljinn náði m.a.til þess að vilja komast hjá eðlilegri tollafgreiðslu. Það er þekkt háttarlag smyglara. Sú lögbrota-lömin telst þó smámunir miðað við eðli allrar aðgerðarinnar.

Almennt ógeð ríkir á Íslandi á þessu vígtólasmygli. Komin er upp kerfiskrísa, vopna-smyglið er sem þvertré, rekið rass á hrossi. Ráðherrar eru á villtum ábyrgðarflótta og Alþingi virðist ráðvillt. Höfuðpaurar að baki þessum vopnaglæfrum eru fóstbræðurinir á embættistoppi valdstjórnarinnar. Þeir telja sig ósnertanlega, búa yfir óheftu geðþótta-valdi. Sama halda norskir herstjórar væntanlega að gildi um sig á norskri grundu. Þeirra gerðir eru gróf íhlutun í íslensk innanríkismál, sem leynt átti að fara gagnvart norskri vinaþjóð Íslendinga.

Tvö skref  leysa þetta mál strax:.

Hið fyrra er að senda samstundis þennan smyglvarning til norskra föðurhúsa.Vopnin eru ennþá skráð eign norska hersins. Drápstæki eru aldrei ,,vinagjöf".

Annað skref er að taka meinta íslenska vopnasmyglara á beinið, eins og vera ber. Það gæti raunar orðið þrautin þyngri eins og háttar innan íslenskrar stjórnsýslu og í stjórnmálum. Undanbragðaleikir eru sérfræðigrein þjálfaðra ráðmanna.

Þriðja skrefið er að koma á  skipan, sem hamlar í sem mestum mæli för friðarspilla í landi þjóðar,sem áfram kýs að standa fjarri heimsins vígaslóð.  Friðarsátt samfélags byggist á siðmennt ,en aldrei á vígvélum og manndrápstækjum. Vitið þér enn, eða hvað ?

  

                                                           Baldur Andrésson  2.nóvember 2014.

Fréttabréf