Grímur skrifar: TÝNDUR Í TVÖ ÁR. ÓFUNDINN ENNÞÁ

Ekki var verðmiði Vaðlaheiðarganga loks fram kominn fyrir tveimur árum, í mars 2019, en hann týndist aftur, sem væri hann tröllum gefinn.

Þeir sem reiknuðu misstu minnið, gleymdu niðurstöðunni strax. Leit hefur engan árangur borið þessi tvö ár frá tapinu. Hún hefur þó einkum beinst að opinberum, upplýstum stöðum. Slíkir tapaðir verðmiðar finnast þó helst í skúma-skotum, sem enn eru ókönnuð.

Umræddur verðmiðaræfill bjó yfir meðfæddri stökkorku frá því að hann birtist Alþingi í 8.7 ma mynd 2012. Hoppaði t.d. þar í 14.3 ma 2017 og í mars 2018 kominn upp í 17 ma. að sögn sjónarvotta, VHG hf.
Var þá 8.3 ma (+ 96%) viðbót þegar lýst, og spennan jókst um hver viðbótin yrði á endastöð, í niðurstöðu sem fram kom í mars 2019. Þeirri sem týndist, sem síðan er því saknað.

Vel kann púður að leynast með týnda verðmiðanum, einkum þó með viðheftum skýringum á ofur-vexti hans.

Almenningur er því varaður við þáttöku í leitinni, en engum fundarlaunum er heitið, nema þá helst ómerkilegum blaðamanna verðlaunum, mjög varasömum.

Stökkbreytti týndi Vaðlaverðmiðinn var óásjálegur við fyrstu sýn 2012, en óx og dafnaði vel í kjölfarið, enda vel fóðraður. Glataða niðurstaðan frá í mars 2019 finnst þó síðar verði er hald margra, nema ef leit verði stöðvuð, vegna sprengjuhættu eða stækrar ólyktar, sem kann upp að gjósa við fundinn.

 

Fréttabréf