ÖRYGGI OG GÓÐ LÆKNISFRÆÐI?

Árið 1976 kom upp svínaflensufaraldur í Bandaríkjunum. Þróun bóluefna var strax hafin og þingið samþykkti undanþágu frá skaðabótaábyrgð fyrir framleiðendur að beiðni Geralds Ford forseta. Í kjölfarið hófust fjöldabólusetningar. Eins og Gerald Posner lýsir í bók sinni Pharma – Greed, Lies and the Poisoning of America, kom síðar í ljós að aldrei var um neina svínaflensu að ræða. Hermaður í herbúðum í Texas fékk öndunarfærasjúkdóm sem dró hann til dauða og var ranglega greindur sem svínaflensa. Í raun og veru var um svonefnda hermannaveiki að ræða, bakteríusýkingu sem á sér upptök í menguðu vatni. En áður en þetta kom í ljós höfðu yfir 40 milljónir manna verið bólusettar gegn svínaflensu.

1976: Öryggi og góð læknisfræði

Þann 12. október 1976 greindi New York Times frá því að bólusetningum hefði verið hætt í níu ríkjum eftir að þrír aldraðir og veikburða einstaklingar höfðu látist í kjölfar flensusprautunnar. Bein tengsl við bólusetninguna höfðu þó ekki verið staðfest.

Þann 17. desember var bólusetningum hætt um allt land, en þá var hafin rannsókn á 94 tilfellum Guillain-Barré taugasjúkdóms, en 51 sjúklinganna hafði fengið bóluefnið, eins og New York Times greindi frá. Það hafði áhrif á ákvörðunina að þá hafði enn ekki tekist að greina nein ný svínaflensutilfelli. En þetta var ekki meginástæðan:

„Sú ákvörðun að hætta svínaflensubólusetningum var tilkynnt í Washington af Dr. Theodore Cooper, aðstoðarráðherra heilbrigðis-, mennta- og velferðarmála. Dr. Cooper sagði ákvörðunina tekna "í þágu öryggis almennings, í þágu trúverðugleika og í þágu góðrar læknisfræði."

2021: 160-földun í tíðni tilkynntra aukaverkana

Veturinn 2019-2020 voru um 70 þúsund manns bólusettir gegn inflúensu hérlendis. Tilkynnt var um níu tilvik aukaverkana, ekkert þeirra alvarlegt, samkvæmt upplýsingum sem bárust með tölvupósti frá Lyfjastofnun þann 1. nóvember 2021.

Þann 12. janúar 2022 höfðu tæplega 290 þúsund manns verið bólusettir gegn Covid-19. Tilkynnt hafði verið um 5.968 tilvik aukaverkana, þar af 268 alvarleg. 171 þurftu á sjúkrahúsvist að halda og af þeim voru 38 tilfelli flokkuð sem lífshættuleg. Tilkynnt hafði verið um 35 dauðsföll.

Aukaverkanir í kjölfar bólusetninga við Covid-19. Lyfjastofnun 12. janúar 2022

Almennt er búist við 1-2 tilfellum alvarlegra aukaverkana á hverja milljón sem er bólusett gegn inflúensu. Aukning tilkynntra aukaverkana á hverja þúsund bólusetta einstaklinga milli áranna 2019 og 2021 er 160-föld. Tilkynningar um alvarlegar aukaverkanir eru því 500-1.000 sinnum fleiri á hverja þúsund en almennt er reiknað með. Við vitum auðvitað að ekki eru allar tilkynntar aukaverkanir af völdum bóluefnisins; í mörgum tilfellum er hægt að finna aðra orsök. Við vitum líka af fyrri rannsóknum að mörg tilvik eru aldrei tilkynnt. Ég veit um nokkur sjálfur. Slíkt kemur ekki á óvart í andrúmslofti þar sem það jafnast nánast á við landráð að gagnrýna sóttvarnaryfirvöld. En ef við gerum ráð fyrir að öll þessi tilvik séu vegna bólusetningar og engin ótilkynnt, þá höfum við 500-1000-földun alvarlegra aukaverkana. Ef hægt er að sýna fram á að helmingur þeirra hafi aðrar orsakir væri aukningin 250-500-föld. Ef aðeins 10% væru ekki af öðrum orsökum þá væru tilfellin samt 50-100 sinnum fleiri en eðlilegt mætti teljast.

Gagnslaus og áhættusöm lyf fyrir fimm ára börn

Árið 1976 snerist málið um öryggi og góða læknisfræði. Gleymum því ekki, að þegar bólusetningunum var hætt höfðu 40 milljónir verið bólusettar og 51 tilkynning borist um Guillain-Barré heilkenni meðal bólusettra. Þetta er ein tilkynning á hverja 800 þúsund bólusetta, aðeins meira en almennt er búist við. Og ekki var einu sinni búið að staðfesta tengslin. Þetta er það sem gerist þegar öryggi og góð læknisfræði eru höfð í hávegum.

Hverjar voru nú aftur íslensku tölurnar? 260 tilkynningar um alvarlegar aukaverkanir á hverja 290 þúsund bólusetta? Ein tilkynning um alvarleg heilsufarsvandamál á hverja þúsund bólusetta. Áttahundruð tilkynningar á hver 800 þúsund árið 2021, á móti einni á hver 800 þúsund árið 1976? Og höfum í huga að þessi bóluefni eru ekki aðeins boðin fólki sem er í raunverulegri hættu ef það smitast af Covid-19. Þau eru boðin öllum, allt niður í fimm ára börn. Fólki sem hefur nákvæmlega enga þörf fyrir þau. Og nú gegn nýjum stofni, sem þau virka ekki einu sinni gegn, eins og þegar hefur verið sýnt fram á. Og yfirvöld nota takmarkanir og þvinganir til að framfylgja áætluninni.

Hvers vegna vakna engar spurningar?

Samt höfum við vitað frá upphafi að bóluefnin gegn Covid-19 eru ekki hönnuð til að koma í veg fyrir sýkingu og það varð ljóst fyrir löngu að þau munu aldrei mynda hjarðónæmi; þau vernda aðeins bólusetta einstaklinginn. Við þekkjum nú þegar hinn gríðarlega mun sem er á Covid-19 dauðsföllum eftir aldurshópum og þar með á þörfinni fyrir þessi lyf.

Hvað varð um öryggi og góða læknisfræði?

Hvers vegna vakna engar spurningar þegar við verðum vitni að svo gríðarlegri aukningu í tilkynningum um aukaverkanir?

Eftir að óttafaraldrinum lýkur verður svara krafist við þessari spurningu.

 

Þorsteinn Siglaugsson hagfræðingur

(Upphaflega birt á ensku á dailysceptic.org 13. janúar 2022)