GOTT AÐ RÆÐA ÞAÐ SEM BRENNUR Á ALLRA VÖRUM

Málþing - islam

Á laugardag kl. 13 verður haldið málþing í Iðnó í Reykjavík undir yfirskriftinni, Stafar hætta af múslimum á Íslandi?

Fundarstjóri verður Markús Þórhallson frá Djúpalæk, sagnfræðingur og þáttagerðarmaður á Útvarpi Sögu. Í upphafi fundar flytja eftirtaldir framsögumenn fimm mínútna innlegg: Bjarni Randver Sigurvinsson, guðfræðingur og trúarbragðafræðingur, Einar Már Guðmundsson, rithöfundur, Gústaf Níelsson, sagnfræðingur, Margrét Steinarsdóttir, framkvæmdastjóri mannréttindaskrifstofu Íslands, Nadia Tamimi, verslunarstjóri, Salvör Kristjana Gissurardóttir, háskólakennari, Sólveig Anna Jónsdóttir, leikskólaliði og aktivisti, Sverrir Agnarsson, formaður félags múslima á Íslandi. Að framsögum loknum fara fram umræður og fyrirspurnir úr sal.

Því miður á ég þess ekki kost að sækja þennan umræðufund en mig langar til að þakka fyrir þetta frumkvæði að umræðu um málefni sem brennur á allra vörum. Fordómar þrífast vegna vankunnáttu og misskilnings og stundum blöndu af þessu tvennu. Með opinni umræðu og skoðanaskiptum má forðast slíkt. Það góða við samstöðufundina í Frakklandi og víðar í kjölfar hryðjuverkanna í París, var meðal annars að skapa mörgu velviljuðu fólki af öllum trúarbrögðum og skoðunum vettvang til að viðra sjónarmið sín og skiptast á skoðunum við aðra. Fundurinn í Iðnó er tilraun til slíkra skoðanaskipta.    

Fréttabréf