HOLLVINUR RÚV NÚMER EITT KVADDUR

Valgeir Sigurðsson

Í dag fór fram í Kópavogskirkju, útför Valgeirs Sigurðssonar, rithöfundar og blaðamanns með meiru. Valgeir var Vopnfirðingur að uppruna, fæddur árið 1927. Hann starfaði um árabil sem blaðamaður á Tímanum, gaf út bækur og rit, var skáld gott og afburðakunnáttumaður á íslenska tungu. Valgeir var skjalavörur á Alþingi frá árinu 1979 þar til hann lét af störfum vegna aldurs árið 1997.
Valgeir Sigurðsson var áhugamaður um samfélagsmál og lét hann til sín taka með ýmsum hætti.
Ég kynntist Valgeiri vel í aðdraganda þess að Hollvinasamtök Ríkisútvarpsins voru stofnuð árið 2003. Áttum við á þessum tíma oft langar samræður og sátum ótal undirbúningsfundi ásamt fleirum þar sem málin voru reifuð og skeggrædd. Áhugi og eldmóur Valgeirs er mér eftirminnilegur og ef ég ætti að útnefna einn mann öðrum fremur hollvin Ríkisútvarpsins þá væri það án nokkurs vafa Valgeir Sigurðsson.
Séra Hjálmar Jónsson jarðsöng hinn látna heiðursmann og mæltist honum vel sem endranær. Hann sagði gamansögu af því að Valgeir hefði einhverju sinni sagt við sig, er hann handlék bókrit nokkurt, að það væri svo undarlegt að þegar þetta rit kæmi út, og væri það árlegur viðbiurður, færi  þjóðfélagið nánast á hliðina. Væri hver útgáfa þó lítt breytt frá fyrra ári. Þetta voru að sjálfsögðu fjárlögin.
Séra Hjálmar sagði að nú fengjum við ekki að vita hverju Valgeir Sigurðsson hefði viljað fá breytt í nýjasta árgangi frumvarps til fjárlaga. Ég sagði séra Hjálamri eftir athöfnina þegar ég þakkaði honum fyrir góð minnigarorð, að ég þættist geta fullyrt um einn þátt sem Valgeir Sigurðsson hefði örugglega viljað breyta. Hann hefði ekki tekið því þegjandi að framlög til RÚV yrðu skert eins og tillaga er nú uppi um. Séra Hjálmar kvaðst ekki efast um að þetta væri rétt til getið enda maðurinn hollvinur Ríkisútvarpsins númer eitt.

Fréttabréf