Fara í efni

ÞANNIG VERÐA JÓLIN GLEÐILEG

Á Þorláksmessu fór ég út í búð að versla. Þar hitti ég gamlan samferðarmann og vin. Hann dvelst langdvölum erlendis en stingur niður fæti hér um jólin.

Hann spurði um pólitíkina á Íslandi. Ég sagði að hér væri lítil pólitík. Alltof lítil pólitík, því miður.

Hann sagði: Hér er þó ekki allt illt. Ég fór í bókabúð og sá að verið er að gefa út fimmtíu, sextíu nýjar bækur, gott ef ekki tuttugu eða þrjátíu ljóðabækur.

Ég horfði á viðmælanda minn þögull og hugleiddi orð hans.

Svo þakkaði ég honum fyrir. Ég væri kominn í jólaskap. Hugsaði bara jákvætt, þökk væri honum og öllum ljóðabókunum.

Fór svo heim og setti Víking Ólafsson á fóninn, opnaði jólapakkana og upp komu Þórarinn Eldjárn, Einar Már, Pétur Gunnarsson og …   

Síðan hef ég verið í góðu jólaskapi.

Gleðileg jól og og ánægjuleg áramót.