HANDRUKKARAR

Er það ekki nokkuð langt gengið að saka sænsk yfirvöld um að vera handrukkara og að það komi frá stjórnarþingmanni. Ég veit ekki annað en að þessi þjóð hafi komið fram við Íslendinga af rausn og háttsemi. Mér er minnisstæð aðstoð Svía í Vestmannaeyjagosinu sem var einstæð. Við verðum að líta í eigin barm og átta okkur á að við höfum unnið tjón á fólki í öðrum löndum og bæta þeim tjónið. Kosturinn fyrir okkur Íslendinga er sá að við erum borgunarmenn fyrir skuldum okkar.
Pétur

Þakka bréfið Pétur. Stuðningur vegna Vestmannaeyja-gossins  er varla syndaflausn  fyrir Svía í Icesave ef það er rétt að þeir gangi erinda ESB einsog ég geri skóna. Fróðlegt væri að kanna bankaumsvif og fjármálahagsmuni Svía í Eystrasaltsríkjunum og tilraunir þeirra að fá ESB stuðning við hagsmuni sína þar. Um þetta hefur verið fjallað. Ég skora á fjölmiðla að fara í saumana á þessu.
Aftur að þínu bréfi Pétur. Þér finnst of langt gengið af "stjórnarþingmanni" að skrifa eins og ég geri um sænsku stjórnina (sem ég aðgreini frá sænsku þjóðinni). Ég hef sömu skoðun í þessu efni hvort sem ég sytyð ríkisstjórn Íslands eða er henni andvígur.  Annað hvort ganga sænsk stjórnvöld erinda andstæðinga okkar eða ekki, óháð því hver ég er eða hvað ég geri.
Íslendingar borga sínar skuldir. Það hefur aldrei staðið annað til. Við viljum hins vegar ekki láta þvinga okkur til að greiða það sem okkur ekki ber að greiða.
Ögmundur