ÍSLENDINGAR EIGA AÐ GANGA ÚR SCHENGEN STRAX !

Það er verið að auglýsa ráðstefnu um Schengen og EES að Bifröst 8. þessa mánaðar. Samferða er látið líta svo út að aðal hlutverk Schengen snúist um fjölþjóða lögreglumál, sem hljómar gott og vel. Hvaða Íslendingur telur ekki nauðsynlegt að hafa hendur í hári erlendra glæpamanna sem hópast til landsins, og Halldór Ásgrímsson drap á í kveðju -ræðu sinni og háttvirtur dómsmálaráðherra sagðist sammála í vefpistli sínum.  Auðvitað eigum við að hafa náið samband við allar grannaþjóðir okkar, ef ekki allar þjóðir heims, hvað lögreglusamstarf snertir, og þá að koma glæpamönnum á bak við lás og slá. En það er ekki aðal ástæðan fyrir Schengen! Að halda því fram er einfaldlega fals og lygi!

Þetta “lögreglumálablaður” er alls ekki aðalmarkmið Schengen.  Aðal hlutverk Schengen er að auðvelda hverskonar fólki að fara yfir landamæri Schengen þjóðanna í frjálsri för, án þess að lögregla viðkomandi þjóðar geti nokkuð gert við því.  Sem sé að auðvelda hverskonar glæpamönnum og þrjótum til að troða sér uppá aðrar þjóðir. Þegar fólkið hefur komist inn í þjóðfélagið, þá er oft mjög erfitt og kostnaðarsamt að losna við það.

Það er viðurkennt að þetta Schengen sem er nafn lítils þorps í Lúxumborg þar sem frumsamningurinn var undirritaður, á milli landa Evrópubandalagsins, svo að fólk ESB gæti ferðast á milli án vandkvæða. Nú stendur til að fjöldi mið-Evrópuþjóða, fyrrverandi fylgiríki Ráðstjórnaríkjanna gangi Evrópusambandið. Þá mun sannast hið fornkveðna, að lengi geti vont versnað. Það eru því tvær grímur komnar á ráðamenn núverandi Schengen þjóðanna.  Bæði er Schengen á röngum forsendum, órekanlegt og rándýrt í rekstri eins og flest er sem Evrópusambandið framkvæmir. Síðan er hitt að stjórnmálamenn og handbendi þeirra nota þessa stofnun sem aðrar, til að ferðast til, sitja og masa á, til einskis nema að kasta á glæ skattpeningum almennings sem þeir lifa á.

Það vita allir að mikill meirihluti íslensku þjóðarinnar er á móti inngöngu í Evrópusambandið en hér eru óprúttnir menn að ota okkur inn í ESB svo að segja bakdyramegin með verunni í Schengen og EES. Allir muna mótmælin og þrýstinginn gegn inngöngunni í EES, en örfáir tóku eftir fyrr en þjóðin var læst inni í hinu kostnaðarsama vandræðfyrirbrigði sem Schengen er.
Ég segi, úr Schengen og einnig úr EES, og göngum alls ekki í ESB.
Ekkert nema kostnaður, vandamál og að sjálfsögðu óendanleg afætuhít. Allt á kostnað almennings!
Úlfljótur