NÚ ER ÞÖRF Á AÐGERÐA-STJÓRNMÁLUM

Hverjum hefði dottið það í hug fyrir örfáum mánuðum síðan að SKJALDBORGIN margumtalaða skyldi slegin utan um úlfagráðug fjármálafyrirtækin í landinu. Ég eins og eflaust flestir taldi að þarna væri rætt um SKJALDBORG fyrir barin og margskattpíndan alþýðumanninn. Það er alveg ljóst að viðskiptaráðherra er skipstjórinn á skútunni í dag, þau hin títtnefnd tvö hafa að sjálfsögðu löngu framselt vald sitt til slíks. Það er sorglegt að horfa uppá þingmenn VG hamast við að virkja sjálfseyðingarforritið. Þeir munu ekki geta treyst á gullfiskaminni litla mannsins lengur þar sem stærri faktorar með vel uppfært innra minni munu svo sannarlega láta til sín taka þegar kemur að endurnýjun umboðs þingmönnum til handa. Úthrópun samstarfsflokkanna er algjör. Þeir kenna sig báðir við sósíaldemókratíska hugsýn, en það skal vera á hreinu að löngu framgengnir forvígismenn þeirrar hugmyndafræði hafa marg snúið sér við í gröfum sínum, alla vega rúmaðist hugtakið knésetning öreiganna ekki innan þeirrar merkingar. Ögmundur, ég vil meina að það dugi ekki að stinga niður penna, það eru bara kurteis samræðustjórnmál, ég held að þú sért maðurinn sem munir iðka aðgerðastjórnmál framtíðarinnar. Ef það reynist ekki rétt þá er bara að halda áfram að skrifa.
Kv.
Óskar K Guðmundsson, fisksali.