Þetta er frábært Ólafur!

Ég tek undir með félaga mínum, Runólfi Áka. Okkar ástsæli forseti stendur vel að vígi í aðdraganda komandi kosninga. Ég vil þó benda á að dálítillar ónákvæmni gætir í frásögn Runólfs af fylgi Herra Ólafs en frávikið er þó ekki mikið meira en þegar títtnefndur Runólfur hélt utan um bókhaldið mitt þegar ég bauð mig fram á sínum tíma til embættis forseta Bandaríkjanna. En á fréttavef RÚV segir sem sagt af Baugskönnuninni með eftirfarandi hætti:

“Fylgi Ólafs Ragnars mælist tæp 64% í skoðanakönnun sem Fréttablaðið gerði um síðustu helgi. Fylgi annarra frambjóðenda er miklu lægra; Baldur Ágústsson er með 5% fylgi og Ástþór Magnússon 0,6% fylgi. 10% aðspurðra sögðust ekki hafa ákveðið sig en 15% hyggjast sitja heima á kjördag. 4,4% neituðu að svara.”

Í framhaldi af þessari litlu leiðréttingu tek ég undir hamingjuóskir Runólfs til Herra Ólafs sem hefur aldeilis staðið sig í stykkinu í boltanum með Baugsurum, að ekki sé nú talað um meistarataktana á skíðunum með fræga fólkinu í Aspen eins og berlega má sjá á veraldarvefnum, nánar tilekið á aspensnowmass.com. Mér er orða vant að lýsa hrifningu minni og segi því bara: Heill forseta vorum og fósturjörð!

Með innilegum hamingjuóskum og hlýjum kveðjum,

Þórólfur Þórðarson frá Ingjaldssandi.