Verða mannréttindi brotin í þjóðaratkvæðagreiðslunni?

Nú eru okkar ástkæru stjórnvöld í óða önn að undirbúa þjóðaratkvæðagreiðsluna um fjölmiðlalögin. Ég vil aðeins minna á nauðsyn þess að koma upp sérstökum kjördeildum í fjölmennustu kirkjugörðum landsins. Það geri ég með sérstöku tilliti til óvenjufjörugrar þátttöku í hinni annáluðu undirskriftasöfnun þar sem skorað var á forseta landsins að synja lögunum staðfestingar. Látnir einstaklingar munu hafa komið þar talsvert við sögu og nýtt sér tölvutæknina rétt eins og við hin sem enn erum ofar moldu og viljum tryggja lýðræðinu framgang. Segir sig sjálft að brýna nauðsyn ber til að setja upp kjördeildir í hinum fjölmennu kirkjugörðum Reykjavíkurprófastsdæmis – allt annað væri brot á mannréttindum. Skora ég hér með á forsætisráðherra að tryggja öllum sínum þegnum greiðan aðgang að þjóðaratkvæðagreiðslunni sem mun væntanlega fara fram um næstkomandi verslunarmannahelgi, ef ég þekki ráðherrann rétt.

Í flestum öðrum grafreitum landsins ættu hins vegar sýslumenn, með gömlu og góðu utankjörstaða-aðferðina að vopni, að geta annað verulegri eftirspurn eftir kosningaþátttöku í þessu stórmerkilega og mikilvæga máli sem snýst fyrst og fremst um tvennt: annars vegar völd og sérhagsmuni auðhringa á borð við Baug, sem lögunum er ætlað að reisa dálitlar skorður við, og hins vegar svo hina ríku hégómagirnd forseta Íslands sem hefur eina ferðina enn svipt hann allri lágmarks dómgreind.
Með bestu kveðju,
Jón Bisness