VILL LÁTA SYNDA MEÐ STRAUMNUM

Ég sem meðlimur VG frá upphafi vil fá að vita hversu langt þú vilt ganga til að ná þínum persónulegu markmiðum til að að öll dýrin í skóginum verði einhuga. Að nota þennan tíma Íslandssögunnar til að koma skítugri fortíðinni aftur að "sínum" kjötkötlum finnst mér ófyrirgefandi. Ef þú getur ekki synt með straumnum í þessu samstarfi og beint þínum áherslupunktum í rólegheitum í réttan farveg, finnst mér að þú ættir að stíga til hliðar og undirbúa betur forsetaframboðið.
Með vinsemd og virðingu,
Gunnar

Það skyldi þó aldrei vera að ég syndi nú með straumnum í þessu máli þótt það hafi vissluega ekki verið í mínu allra þrengsta umhverfi. Það skal fúslega játað og án iðrunar að ekki hef ég alltaf synt með straumnum. En ef þú þekktir betur til myndir þú aldrei bera það upp á míg að ég sé að reyna að koma "skítugri fortíðinni" aftrur að kjötkötlunum. Ég frábið svona tal. Getur verið að þú gerir þér ekki grein fyrir um hvaða hagsmuni er að ræða? Hefurðu hugleitt að nærri helmingur Landsbanka-eignanna eru hér á landi og um það að ræða að koma þeim úr landi í erlendum gjaldmiðli, að "samningurinn" gekk út á að Icesave eignirnar myndu aldrei ganga upp í vextina sem krafist er að við greiðum og að þeir voru eitt hundrað milljónir á dag frá 1. jan. 2009? Öllu þessu þarf að koma úr landi í erlendum gjaldeyri, sem fyrst þarf að afla og koma í hendur ríkissjóðs. Þegar um er að tefla að ná fram breytingum á þessu þá leyfir þú þér að saka mig um að vera í einhverjum barnalegum "persónulegum" erindagjörðum um að koma á sátt "allra dýranna í skóginum". Þú skalt ekki gera lítið úr þeim ávinningi sem þegar er orðinn í Icesave deilunni með þverpólitískri samstöðu og nú síðast þjóðaratkvæðagreiðslu sem gefið hefur okkur tilefni til að tala okkar máli á erlendri grundu. Einnig það skiptir máli fyrir trúverðugleika okkar og þar með veraldlegt gengi. 
Kv.
Ögmundur