"Ekkert þras við Geira gas/ Ekkert mas við vændiskonu ..........."

Þetta segir í gömlum vísuhelmingi og gæti verið í stíl við umkvartanir forsætisráðherrans Halldórs Ásgrímssonar um þessar mundir. Yfir okkur hellast ljót tíðindi frá Írak. Flaumur ótíðinda hefur nú staðið á annað ár. Halldór er þreyttur.
Til viðbótar þessu klifa þrasgjarnir stöðugt á því við sama Halldór hvaða erindi Íslendingar áttu til að ryðja heljarslóð fyrir Bandaríkjamenn inn í olíuauðugt þróunarland í Asíu.  Flestir Íslendingar eru löngunarlausir til mannvíga, latir til þjófnaðar á lífshamingju fjarlægra þjóða. Þeir pexa og rexa yfir því hlutskipti að vera útnefndir hjól undir voldugum bandarískum stríðsvagni í austurvegi gegn vilja sínum. Engan frið finnur ráðherrann fyrir nöldrinu.
Þegar nú er reiknaður stríðskostnaður Bandaríkjamanna eru 18.000 milljarðir króna nefndar og þá er ekki allt með talið. Enginn þorir að reikna manntjón Íraka til fulls eða tölu limlestra á líkama og sál. Sultur og seyra blasir í því landi við hundruðum þúsunda barna. Allt Írak er sundurbrotið og lamað og reiknimeistarar kunna ekkert að verðmeta það tjón allt,sem Írakar hafa þolað.
Forsætisráðherrann er þreyttur segir hann. Hann skilur ekki áhyggjur landa sinna. Stuðningur ráðherrans við Íraksinnrás var díleitaður af heimasíðu Hvítahússins. Með því er hann ekki lengur "söguleg staðreynd". Það er enginn listi segir Halldór og  var aldrei listi segir Halldór nú. Það sem er horfið var aldrei. Sú staðreynd blasir við og það er þreytandi að hamra á henni.
Eftir langa mæðu ráðherrans fékkst Eiríkur Tómasson til að slá botninn í þrasið fyrir skömmu. Niðurstaða Eiríks var að ákvörðunin um stuðning við Íraksinnrás hefði verið minniháttar utanríkismálefni á Íslandi.  Ákvörðun Íslands og nokkurra ríkja var áður sögð forsenda Íraksinnrásar, sem samkvæmt þessu var smámál, ekki heimsviðburður. Þetta er lögmannsálitið. Þjóðaræsingur Íslendinga stafar af vanþekkingu þeirra á eigin lýðræðiskerfi og vanmati þeirra á ráðherravaldi. Íraksinnrás var og er smámál milli vina. Þarft er að kynna Írökum þá niðurstöðu og heimsbyggðinni allri. Kannski er þegar búið að díleita Íraksinnrásinni af heimasíðu Hvíta hússins? Það sem er horfið var aldrei. Þá geta þreyttir sofið rólegir.

P.S. Það sem skrifað var á hádegi í dag 26.1.05

       stenst ekki að kveldi. Listinn horfni gekk aftur

       á heimasíðu Hvíta Hússins til nýrra lífdaga.

       Ennfremur er þá upplýst að aldrei var

       Íraksákvörðun orðuð á vettvangi ríkis-

       stjórnar Íslands þrátt fyrir ósönn ummæli

       Halldórs þar um.  CNN fréttastofan var

       sá,sem upplýsti samráðherra Davíðs og Halldór

       um stórákvörðun þeirra fyrir hönd Íslands

       í umdeildu heimsmáli.

                 Nú er aftur ræs hjá ráðherranum !