Frjálsir pennar

Í fjöldamorðunum þann 11. september 2001 dóu tæplega 3000 manns. Þessi fjöldamorð, þau mestu í nútímasögu Bandaríkjanna, vöktu réttmætan óhug um allan heim og kölluðu fram mikla samúð við syrgjendur og við bandarísku þjóðina. Þótt engin samtök hefðu lýst sig ábyrg fyrir þessum fjöldamorðum, kappkostuðu stjórnvöld og þingmenn Bandaríkjanna að kenna Al Qaeda samtökunum og Osama bin Laden um verknaðinn.

Margir hafa - af skiljanlegum ástæðum - treyst opinberri frásögn bandarískra yfirvalda um atburðarásina og um meinta aðild Osama Bin Laden að fjöldamorðunum. Fjölmiðlar, sem byggðu frásagnir sínar aðallega á upplýsingum frá alríkislögreglunni (FBI) í Bandaríkjunum, gátu að sjálfsögðu ekki sannreynt heimildir sínar en miðluðu tilkynningum FBI nær gagnrýnislaust. Okkur var því sagt að þann dag hafi 19 nafngreindir arabar rænt fjórum flugvélum sem þeir hefðu notað til sjálfsmorðsárása á World Trade Center og Pentagon. Þessi saga féll að vísu vel að fordómum vesturlandabúa gagnvart múslímum en smám saman kom í ljós að enginn fótur var fyrir henni.(1)

Mörgum kann að þykja furðulegt að bandarísk yfirvöld hafi ekki lagt fram sannanir til að styðja framburð sinn. En þetta er nú samt svo. Bandarísk yfirvöld hafa frá fyrsta degi reynt að fela staðreyndir. Þeim hefur tekist að koma í veg fyrir að þurfa að leggja fram sönnunargögn um ásakanir sínar,(2,3) fjarlægt eða eyðilagt þau,(4,5) krafist þagnar af þeim sem búa yfir þýðingarmikilli vitneskju(6,7,8,9) og mútað ættingjum fórnarlamba til að leita ekki til dómstóla.(10) Þrátt fyrir gylliboð yfirvalda – að meðaltali $1,8 milljón á mann – hafa sumir ættingjar fórnarlamba neitað þessari dúsu og kosið að þvinga fram sannleikann, ef þarf með milligöngu dómstóla. Þrátt fyrir handtökur og langvarandi varðhaldi á hundruðum einstaklinga, (11) er athyglisvert að bandarísk dómsyfirvöld hafa ekki treyst sér til að ákæra og sakfella nokkurn mann um beina eða óbeina aðild að þessum fjöldamorðum.(12)

Í raun ættu þessi formáli og þær heimildir sem að baki liggja að nægja til að afskrifa samsæriskenningu bandarískra yfirvalda. En það er margt fleira sem rennir stoðum undir þann grun að þau hafi óhreint mjöl í pokahorninu. Hér eru nokkrar áleitnar spurningar um það sem gerðist 11. september 2001 – og bandarísk yfirvöld neita að svara:

(A) Á vefsíðu bandarísku alríkislögreglunnar (FBI), er birtur listi með nöfnum (13a) og myndum(13b) nítján araba sem hún segist gruna um hryðjuverkin 11. september. Að minnsta kosti sjö þessara manna eru enn á lífi.(14,15,16,17,18) Hvernig má það nú vera? Hverjir frömdu þá árásirnar?

(B) Yfirmaður FBI, Robert Mueller, viðurkenndi 19. apríl 2002 að engin gögn hefðu fundist í Bandaríkjunum né erlendis um undirbúning árásanna ("The hijackers also left no paper trail. In our investigation, we have not uncovered a single piece of paper—either here in the United States or in the treasure trove of information that has turned up in Afghanistan and elsewhere—that mentioned any aspect of the Sept. 11 plot").(19) Hann gaf þá skýringu að flugræningjarnir, strangtrúaðir múslímar, hefðu þaulskipulagt árásirnar með mikilli leynd.

Hvernig samrýmist þessi lýsing hans fréttunum sem birtust dagana eftir árásirnar um að þessir strangtrúuðu múslímar hefðu skilið eftir kóran á barstól á nektarbúllu sem þeir stunduðu reglulega;(20,21) drógu að sér athygli með frekju(22) og með því að rifast við ókunnuga á bílastæði rétt áður en þeir rændu flugvél;(23) skilið eftir sig flugkennslubók á arabísku og kóran í bílaleigubíl við flugvöllinn; (24) að vegabréf eins þeirra hefði fundist, eins og af tilviljun, í rústum turnanna í New York meðan allt annað hefði brunnið til kaldra kola;(25,26,27,28) að tveir hinna meintu flugræningja hefðu komið með öðru flugi frá Portland til Boston að morgni 11. september og stefndu þannig í hættu áætlunum sínum um flugrán, hefði fyrri vélinni seinkað; að Mohammed Atta, einn hinna meintu flugræningja, hefði skilið eftir kveðjubréf, kóran, flugkennslubók og jafnvel brúðkaupsföt til að taka með sér í paradís, í tösku sem náði ekki að komast um borð í flugvélina sem hann er sagður hafa rænt?(29,30,31)

Einhverjir hlutu að sjá sér hag af því að dreifa sönnunargögnum af þessu tagi og einhverjir töldu æskilegt að bendla múslíma við árásirnar. Eigum við að trúa því að harðsvíraðir hryðjuverkamenn sem undirbúa flóknar og samræmdar aðgerðir og hyggjast mæta Allah sem píslarvottar í trú sinni, sýni slíkt kæruleysi og drýgi hór rétt áður en þeir komast í paradís? Að ungir menn með fulla vasa af peningum undirbúi gaumgæfilega að fyrirfara sér fyrir einhvern málstað ?(32)

(C) Nöfn farþega og flugræningjanna ættu að koma fram á farþegalistum.(33) Farþegarlistarnir eru meðal mikilvægustu skjala sem gætu sannað að hinir meintu flugræningjar með arabískum nöfnum stigu upp í flugvélar þann 11. september. En bandarísk yfirvöld neita alfarið að birta þessa lista. Undirritaður hefur fengið það staðfest bæði hjá FBI og hjá American Airlines að "original" farþegalistarnir voru ekki birtir og að ekki stæði til að birta þá. Hvergi hefur komið fram opinberlega að arabar voru í þessum flugvélum. Hvers vegna þora bandarísk yfirvöld og flugfélögin ekki að birta frumlistana?(34)

(D) Ættingjum Osama Bin-Laden í Bandaríkjunum var flogið milli staða í Bandaríkjunum með leynd meðan allt flug lá niðri í Bandaríkjunum og bandarískir borgarar fengu ekki að fljúga.(35,36) Hver heimilaði þetta flug og hvers vegna lá svo mikið á að leyfa þeim að yfirgefa Bandaríkin?

(F) Þann 11. september síðla dags hrundi þriðja háhýsið við World Trade Center, 47 hæða byggingin WTC-7.(37a,37b,37c) Engin flugvél skall á þessari byggingu. Talið er að brot úr turnunum hefðu dottið á háhýsið og kveikt í. Aldrei áður hefur nokkurt háhýsi hrunið af völdum eldsvoða. Byggingin hrundi lóðrétt á nokkrum sekúndum eins og þegar verktakafyrirtæki rífa niður hús með sprengiefni. Eigandi byggingarinnar, Larry Silverstein, sagði í sjónvarpsviðtali að hann hafi samþykkt að láta rífa bygginguna niður ("Let's pull it"). Hvers vegna þögðu flestir fjölmiðlar um þennan fordæmislausa atburð og hvers vegna hefur rannsóknarnefnd bandaríska þingsins ekki heimtað skýringu á hruni þessa háhýsis?

(G) Nokkrir slökkviliðsmenn og blaðamaður BBC sem voru á staðnum telja sig hafa orðið varir við sprengingar áður en WTC turnarnir hrundu.(38,39,40) Hvers vegna sýndi rannsóknarnefnd bandaríska þingsins engan áhuga á að ganga úr skugga um sannleiksgildi þessa vitnisburðar?

(H) Sjónarvottar telja að fjórða "rænda" flugvélin (flug United Airlines 93) hafi verið skotin niður í Pennsylvaníu áður en hún skall niður til jarðar.(41) Brak úr vélinni og líkamsleifar fundust á 12 km. svæði. Hvers vegna sýndi rannsóknarnefnd bandaríska þingsins engan áhuga á að yfirheyra þessa sjónarvotta?

(I) Bandarísk yfirvöld halda því fram að flugræningjar hafi flogið arþegaflugvél allt að því lárétt að varnarmálaráðuneytinu í Washington, að flugvélin hafi brotið sér þrönga leið í gegnum sterka veggi og horfið sporlaust ásamt vængjum inn í bygginguna.(42) Heilbrigð skynsemi mælir gegn þessari skýringu. Margir efast um þessa sögu af tæknilegum ástæðum.(43) Sjónarvottum ber ekki saman hvað flaug framhjá þeim. FBI hefur lagt hendur á myndband frá öryggismyndavél sem var beint að ráðuneytinu en neita að birta það. Hvers vegna neita bandarísk yfirvöld að birta þetta myndband af aðflugi þessarar flugvélar og framvísa brotum úr flugvélinni?(44a,44b)

(J) Meðan árásirnar fóru fram og bandaríska þjóðin sat skelkuð við sjónvarpið, hlustaði forseti Bandaríkjanna í rólegheitum á grunnskólabörn í Florida lesa sögu um geit. Þegar honum hafði verið tilkynnt um árásirnar á turnana, sagði hann ekkert, spurði ekki ráðgjafa sína nánar, gaf enga tilskipun heldur hélt áfram að spjalla við börnin eins og ekkert hefði gerst. Af þessu er til myndband á netinu.(45a) Eru þetta eðlileg viðbrögð forseta og yfirmanns allra herja sem fær óvænta tilkyningu um árás á landið og þarf að taka skjótar ákvarðanir? Eru þetta eðlileg viðbrögð lífvarða forseta Bandaríkjanna að hafast ekki að þegar fréttir um samræmdar aðgerðir gegn Bandaríkjunum berast? Hvernig gátu þeir vitað að ekki yrði ráðist á forsetann?(45b,46)

(K) Skýrar reglur eru í Bandaríkjunum um það hvernig herinn á að bregðast við ef flugvél týnist af leið, ef samband við hana rofnar eða flugvél er rænt. Venjan er sú að orrustuvél er send á loft til að mæta viðkomandi flugvél og neyða hana til að lenda. Til slíkra viðbragða þarf ekki sérstakt leyfi háttsettra yfirmanna, ráðherra eða forseta. Hvers vegna fór herinn ekki eftir þessum reglum á þessum degi þótt ljóst hafði verið að tveimur farþegaflugvélum hafði verið rænt, þeim steypt á turnana í New York og að þriðja árásarvélin hafði verið á leið til höfuðborgar Bandaríkjanna?(47,48,49,50)

(L) Var tómlæti hersins ef til vill tengt því að einmitt þann 11. september 2001 fóru fram æfingar á vegum bandaríska hersins hvernig verjast ætti flugárásum á Bandaríkin og hrapi flugvélar á stjórnarbyggingar í Washington? Var valið á þessari dagsetningu alger tilviljun ?(51,52,53,54,55)

(M) Fimm Ísraelsmenn sáust kvikmynda hrun turnanna beggja, fagnandi sigri. Þeir voru handteknir og sendir til Ísraels eftir tveggja mánaða varðhald án þess að ástæðan fyrir varðhaldinu hefði verið gefin upp. Á hvers vegum voru þeir og hvað olli fögnuði þeirra ? Vissu þeir fyrirfram um árásirnar ?(56,57)

(N) Hver ákvað að hætta rannsókn á meintum innherjaviðskiptum með hlutabréf flugfélaganna United Airlines og American Airlines?(58,59)

(O) Fjölskyldur fórnarlamba spyrja: Hver ákvað að fjarlægja stál frá rústum turnanna í New York og selja það til bræðslu áður en stálið hafði verið rannsakað til að kveða upp úr hvað olli hruna turnanna? Er það venja að fjarlægja sönnunargögn af morðstað(60)

Þetta eru aðeins nokkrar af þeim fjölmörgu spurningum sem ættingjar fórnarlamba og almennir borgarar hafa sett fram en ekki fengið svör við.

Kerfisbundnar tilraunir bandarískra yfirvalda til að fela staðreyndir um fjöldamorðin 11. september og koma í veg fyrir upplýsingu málsins, vekja grun um aðild þeirra sjálfra að þessum fjöldamorðum. Sú aðild gæti verið sú að þau hafi vitað fyrirfram um árásirnar og ekki aðhafst, að þau hafi stuðlað að árásunum með virku aðgerðarleysi og yfirhylmingu eða hafi jafnvel sjálf skipulagt þær og framið. Þetta eru ógnvekjandi tilgátur sem ekki er unnt að hunsa eftir að hafa kynnt sér staðreyndir máls. Baráttan um sannleikann mun því halda áfram þótt stjórnmálamenn og fjölmiðlamenn haldi áfram að útbreiða samsæriskenningu um 19 múslíma.

Samantekt: Elías Davíðsson, 11. september 2004

Allar ábendingar um mistök eða vafasamar heimildir eru vel þegnar. Þær sendist til Elíasar edavid@simnet.is