ALLT ER ÞEGAR ÞRENNT ER

Það var glatt á hjalla hjá þeim Framsóknarmönnum nú um helgina. Þeir sem töpuðu voru sagðir meiri stjórnmálamenn en áður (hvað sem það þýðir), sem sé ungmennafélagsandinn sveif yfir vötnunum. Lítið var rætt um pólitík, enda stefnan löngu týnd og reyndar óþörf, völd er grunnur góðrar ráðningarstofu.
Hins vegar var farið með gamanmál, mikið var hlegið af því þegar Jón Sigurðsson lagði túnþökur hjá Guðna Ágústssyni og græna hliðin snéri upp, en sem kunnugt er þá er Framsóknarflokkurinn frægastur fyrir að böðlast um allt land og snúa við grónu landi þannig að brúna hliðin snúi upp.
Tvíræðasti brandari þings var þegar Jónína Bjartmarz sagði "allt er þegar þrennt er" eftir tap í kosningum við Guðna. Þingheimur bókstaflega ærðist af hlátri. Guðni sem var að maula köku frussaði henni út yfir þingheim. Ég leit undrandi á konu mína. "Hvað er svona fyndið". "Þú ert alltaf sami einfeldningurinn, það verður ekkert “þrennt”, Framsóknarflokkurinn er dauður, þetta er allt saman grín", svaraði konan og þurrkaði tárin úr augunum skellihlæjandi, enda Framsóknarmanneskja á yngri árum.
Runki frá Snotru