"ÁSTANDIÐ"

Sæll Ögmundur.
Í ágætu bréfi frá Árna V. hér á síðunni, með yfirskriftinni "Allt að forskrift AGS?" er greinargóð og skýr lýsing á "ástandinu" á ríkisstjórnarheimili þeirra Steingríms J. og Jóhönnu. Allir á heimilinu virðast vera á fullu í "ástandinu" en húsbændurnir á heimilinu banna öllum að ræða það. Bara má ekki ræða það, bara alls ekki. Heimilsfólkið má kannski, svona innra með sér, blístra voða lágt: "Það er draumur að vera með alþjóða gjaldeyrissjóði ... og finna hve fallega þeir gera ... dásamlega dúdderí og sjúdderí dú ... Flanagan og Franek og sá frægi ... vínarvalsa-kaninn í nikkunnar æðsta dómi ... í einum sussu sussu rómi." Á ekki sauðsvartur almúginn bara að þakka fyrir að það er enn til svona "fínt fólk" á Íslandi, sem virðist vera í náðinni hjá stríðs-kapítalistum heimsins; fær að vera í alvöru "ástandi" enn og aftur og enn á ný til hægri og vinstri og upp og niður og norður og niður? Er ekki dásamlegt að við höfum svona fína ÁSTANDS - ríkisstjórn? Eigum við ekki bara að vera rosalega þakklátir Ögmundur minn? Og kannski færð þú mas. bráðum að sitja í baksætinu á bjúkkanum, nú eða kannski í kátiljáknum? Þá verður nú aldeilis "endurreisn" ... skv. áætlun AGS. Eða hvað? Nú, eða eins og Árni V. bendir óbeint á, þá er stefnuskrá VG komin inn á kamar AGS... stefnan orðin meikóver í geimóver ... svona eins og Siggi Sigurjóns að klína lit á varirnar með PLÚTÓ-crazy varalit.
Pétur Örn Björnsson