Sunnudagskastljós Evu Maríu eru prýðileg. Það á alla vega við um Kastljósþáttinn í kvöld þar sem rætt var við Ásthildi Skjaldardóttur, bónda á Bakka á Kjalarnesi, eina kúabúi Reykjavíkur.
Lífið snýst ekki bara um viðskipti, sagði bóndinn á Bakka, heldur
um börn, fjölskyldu og samfélag.
Heyrt hef ég í fólki sem tendraðist upp. Einn þeirra var fyrrum skólameistari bændaskólans á Hólum í Hjaltadal í Skagafirði, þar áður bóndi í Bjarnarhöfn á Snæfellsnesi og enn lengra aftur bóndasonur á Ströndum. Þetta er að sjálfsögðu
Jón Bjarnason, þingmaður Vinstrihreyfingarinnar græns framboðs.
Jón Bjarnason hringdi í mig í kvöld og spurði hvort ég hefði heyrt þetta viðtal við Ásthildi Skjaldardóttur. Það hafði ég ekki gert en hlustaði á það á netinu að ráði Jóns.
Eftir að hlusta á viðtalið við Ásthildi skil ég hvers vegna
Jón Bjarnason hafði hrifist. Það er einfaldlega traustvekjandi að hlusta á fólk sem hefur trú á sjálfu sér, íslenskum landbúnaði og að hann eigi erindi inn í framtíðina. Í kvöld segir
Jón Bjarnason á vefsíðunni
http://naut.is eftirfarandi ( og tek ég undir hvert hans orð): "
Málflutningur Ásthildar í Kastljósi í kvöld var svo einstaklega hlýr og þrunginn virðingu og gleði gagnvart lífinu og búskapnum að það lét engan sem á horfði ósnortinn. Það eru einmitt rök fólks eins og Ásthildar,hennar afstaða og sýn sem mun bera íslenskan landbúnað inn í framtíðina. Megi Ásthildur hafa kæra þökk fyrir."
Hér er tengillinn á umrætt Kastljós:
http://dagskra.ruv.is/streaming/sjonvarpid/?file=4301671
