Er stríð aldrei réttlætanlegt?

Ég á erfitt með að skilja afstöðu Vg til stríðsins í Afganistan. Hvað hefðu Bandaríkin átt að gera? Ekkert? Er aldrei réttlætanlegt að fara út í stríð að ykkar mati?
Sveinsson

Þakka þér bréfið. Það má halda áfram með þessa spurningu. Mannréttindi hafa verið fótum troðin í Afganistan í langan tíma. Var rangt að ráðst ekki fyrr inn í landið? Var sama hver gerði það svo fremi sem takmarkið var að efla mannréttindi, ekki síst kvenna? Einmitt það sögðust Sovétmenn vera að gera þegar þeir voru með setulið í Afganistan fyrir  1980 og vel fram á níunda áratuginn. Það er vissulega staðreynd að stjórnin sem þeir studdu átti í höggi við það sem við myndum kalla miðaldalénsveldi, höfðingjaveldi sem beitti konur harðræði. Engu að síður voru Sovétmenn gagnrýndir um nær allan heim fyrir árásarstríð, fyrir að hugsa fyrst og síðast um eigin hagsmuni. Sama á við um Bandaríkin nú. Þau eru fyrst og fremst að gæta eigin hagsmuna í þessum heimshluta. Mannréttindin eru í öðru eða þriðja sæti. Reyndar held ég að þeir hirði lítið um þau nema til málamynda. Colin Powel sem nú var að láta af störfum sem utanríkisráðherra Bandaríkjanna, sagði fljótlega eftir innrásina í Afganistan, að hagsmunum þarlendra kvenna yrði aldrei fórnað,  "engir samningar verða gerðir á kostnað afganskra kvenna." Ekki leið langur tími þangað til að einmitt það var gert. Samið var við blóði drifna stríðsherra og þeim fenginn yfirráð yfir nær öllu landinu. Þeir fótumtroða mannréttindin, ekki síst réttindi kvenna. Er forsvaranlegt annað en að ráðast á þá? Ég spyr. Sjálfur kann ég ekki svarið að öðru leyti en því að ég tel að reynslan sýni að núverandi Bandaríkjastjórn er ekki bandamaður sem hollt er að fylgja sofandi og gagnrýnislaust eins og núverandi ríkisstjórn gerir.
Kveðja,
Ögmundur
p.s. sjá nánar um sama efni: hér