ERU ENGIN VIÐURLÖG VIÐ ÞVÍ AÐ EYÐILEGGJA EFNAHAGSKERFI ÞJÓÐAR?

Það sést lítið af þeim í kastljósum sjónvarpsstöðvanna núna drengjunum sem voru að ráðleggja almenningi hvaða hlutbréf hann ætti að kaupa til að verða ríkur. Þeir virðast líka forðast kastljós fjölmiðlanna bankastjórarnir sem með vanþekkingu sinni og kúltúrleysi bera ábyrgð á því að útrásin sem svo er nefnd fór í vaskinn. Nú tala þeir ekki um samfélagslega ábyrgð sína þegar heilt samfélag, heilt efnahagskerfi þjóðar, er á heljarþröm af því þeir stóðu sig ekki í stykkinu. Þeir halda sig heima og láta lítið fara fyrir sér í rándýru húsunum sem þeir keyptu og endurbyggðu á besta stað í bænum. Ábyrgð þeirra felst í að senda fram á völlinn hagfræðinga sem telja almenningi trú um að nú sé brýnast að taka fimm hundruð milljarða lán. Stjórnmálamennina sannfærðu þeir á einni nóttu í marz.  Svona horfir þetta við mér Ögmundur. Eftir einkavæðingu bankanna komust til valda í peningakerfinu menn sem höfðu takmarkaða þekkingu á alþjóðlegum bankaviðskiptum. Þeir áttu innhlaup hjá okurlánurum heimsins og slógu þar lán til hægri og vinstri. Sameiginlega lögðu þeir til atlögu við fasteignamarkaðinn sem mistókst og þýddi að bankarnir gátu til allrar hamingju ekki hneppt nema eina kynslóð í fasteignaviðskipti við sig til fimmtíu ára. Einn angi séríslensku bankakreppunnar er að bankana vantar viðskiptavini til að standa undir óhagsstæðum lánum sem útrásarsnillingarnir töldu óhætt að taka. Og nú vilja þeir aðgerðir af hálfu Sjálfstæðisflokks og Samfylkingar. Traustið sem þessir flokkar njóta á alþjóðlegum fjármálamörkuðum í kompaníi við bankana íslensku er slíkt að þrátt fyrir óskiljanlega lagaheimild Alþingis þá getur þessi hópur ekki fengið lán við viðráðanlegum vöxtum. Það er ekki „alþjóðleg lánsfjárkreppa" sem veldur. Af hverju skyldi smáríki þar sem allt er í dúndrandi sveiflu, þegnarnir ánægðir, þar sem bjart er framundan og þar sem tækifærin blasa við í orkuhungruðum heimi, já, af hverju skyldu þau ekki fá lán Geir og Ingibjörg, Sigurður og Smárason, Jón og allir hinir ólfarnir? Ætli gamla góða orðið lánstraust skýri þetta ekki.  Þessi valdaflokkur nýtur ekki lánstrausts í útlöndum. Er það ekki bara skiljanlegt? Fyrst settu hinir ábyrgu efnahagslífið í uppnám, síðan skríða bankarnir oní forsætisráðuneyti og fá tryggingu fyrir því að
Íbúðalánasjóður kaupi af þeim bréf og þegar fíkillinn þarf meira þá vilja menn risalán - ábyrgðarmaðurinn er Samfylkingin og Sjálfstæðisflokkurinn fyrir hönd barnanna okkar og barnabarna. Er enginn sem treystir sér til að mótmæla þessu vistarbandi Samfylkingarinnar? Sér enginn að bankastjórarnir eru ekki í neinu? Kynslóðin á svörtu og gráu reinsunum brást öllum öðrum en sjálfum sér. Það er afskaplega mikilvægt að þetta lið fái að kynnast því sem Sjálfstæðisflokkurinn trommar upp með á tyllidögum, frelsi og umfram allt ábyrgð einstaklinganna. Í hverju ætli ábyrgðin á því að eyðileggja efnahagskerfi þjóðar liggi? Ætli það séu engin viðurlög við því að eyðileggja efnahagskerfi heillar þjóðar og smeygja vistarbandi sautjándu aldarinnar um háls nokkurra kynslóða fram í tímann með fimm hundruð milljarða risaláni? Og fjölmiðlarnir þegja, enda eiga þeir alla fjölmiðlana, ríkisvaldið og bakmenn bankakerfisins.
Til hamingju með daginn,
Ólína