FRAMSÓKNARFLOKKURINN í BLÚSSANDI SÓKN

Samkvæmt nýrri skoðanakönnun sem Ker hf og Vátryggingafélag Íslands gerðu fyrir Framsóknarflokkinn í gærkvöldi er flokkurinn með um 90% fylgi en aðrir flokkar talsvert minna. Spurt var: Hvaða stjórnmálaflokk myndir þú styðja ef kosið yrði til Alþingis á morgun. 89% kváðust mundu kjósa Framsóknarflokkinn.
Úrtakið var svokallað random úrtak úr félagaskrám flokksins og náði til 200 félaga. Svörun var með miklum ágætum, aðeins 2 neituðu að svara og þá á þeim forsendum að aldrei væri kosið til þings á föstudegi.
Fleiri athyglisverðar niðurstöður skiluðu sér úr spurningavagni Kers og VÍS. Þar á meðal var spurt: Finnst þér fallegt af stjórnarandstöðunni að leggja Framsóknarflokkinn í einelti vegna einkavæðingar undanfarinna ára? 99% svöruðu spurningunni neitandi.
Þá var spurt um ánægju með þær breytingar sem Olíufélagið ESSO gerði á félagsmiðstöð Framsóknar við Hverfisgötu í Reykjavík á sínum tíma. 66% kváðust sáttir við breytingarnar en 32% bentu hins vegar á að það hefði sýnt sig í síðustu kosningabaráttu að barinn væri of lítill og bjórkranarnir of fáir. Þannig er ljóst að ESSO verður að ráðast í einhverjar viðbótarbreytingar og ætti amk. hvers kyns dæluþjónusta ekki að vefjast fyrir mönnum þar á bæ.

Sjá nánar um niðurstöðu könnunarinnar á www.thadersogottadgraeda.is
Ebenezer Ingimundarson
fréttaritari, Hriflu