GEYSIR OG GÓÐ BRETLANDSTENGSL

Í sumar leið kom hingað til lands hópur breska þingsins. Hann hafði áður komið hingað sumarið 2008 en þá hafði nokkur tími liðið frá heimsókn. Ég hafði hönd í bagga með þessum heimsóknum enda áhugamaður um góð tengsl við breska þingið.
Eftir að skarst í odda með Íslendingum og Bretum út af Icesave urðu þessi tengsl enn mikilvægari, en því miður voru þau ekki ræktuð sem skyldi þegar virkilega á reyndi.

 Ögmundur Jónasson, Einar Árnason, Benedikt Jónsson sendiherrra
og Austin Mitchell þingmaður Verkamannaflokksins fyrir Grimsby 

Á fundum mínum með breskum þingmönnum bæði úr Íslandsnefndinni og utan hennar í vikunni sem leið, ræddum við m.a. Icesave deilur. Ekki varð ég var við annað en mikinn velvilja í garð Íslendinga og er það reyndar mín tilfinning að það sé smám saman að renna upp fyrir breskum stjórnmálamönnum hve mikla ósanngirni þeir sýndu Íslendingum í aðdraganda hrunsins og áttu með beitingu hryðjuverkalaganna sinn þátt í að atburðarásin varð sú sem við þekkjum.
Þetta sögðu bresku þingmennirnir í sumar og Fabian Hamilton þingmaður frá Leeds og mikill Íslandsvinur lá ekki á þessum skoðunum sínum við íslenska fjölmiðla í sumar. Allt þetta var ítrekað við mig í þessari heimsókn. Það var gagnlegt að hitta bresku þingmennina að nýju, menn á borð við Austin Mitchell, þingmann frá Grimsby sem á sér litríka og skemmtilega sögu í stjórnmálum. Hann var fyrr á tíð þekktur fjölmiðlamaður og og hefur jafnan um hann gustað.

Fabian Hamilton þingmaður Verkamannaflokksins fyrir Leeds og Benedikt
Jónsson sendiherra
Bretlandsheimsókn á vef Innanríkisráðuneytisins: http://www.innanrikisraduneyti.is/frettir/nr/27316

Til gamans má geta þess að í Íslandshópunum -fer reyndar fyrir honum og öðrum vinahópum Norðurlandanna í breska þinginu -  er lávarður sem ég hef ekki enn átt kost á að ræða við þótt ég hitti hann í mýflugumynd í breska þinginu í Bretlandsheimsókn minni nú. Þetta er Janric, jarlinn af Craigavon (Lord Craigavon). Hann er afar vel látinn maður og mikill vinur Íslands.  
Það sem mér þykir umhugsunarvert nú á tímum umræðu um eignarrétt á landi og auðlindum er að fjölskylda hans, sem er írsk, var um skeið eigandi Geysis í Haukadal. Geysir komst í eigu fjölskyldunnar 1894 og var í erlendri eigu þar til höfðinginn Sigurður Jónsson festi kaup á þessari dýrmætu náttúruperlu og færði íslenska ríkinu að gjöf. Það var árið 1935.
Þessi tilhugsun þykir mér ágæt áminning til okkar í samtímanum að varðveita náttúruna og perlur hennar í þjóðareign.
Áður hef ég vakið á þessu athygli hér á síðunni: https://www.ogmundur.is/is/greinar/geysir-tilheyrir-thjodinni-enntha