GLEÐILEG JÓL!

Ég sendi öllum lesendum síðunnar hjartanlegar jólakveðjur.
Jólin eru annað og meira en nokkrir helgidagar frá vinnu. Jólin eru tími slökunar og samveru fjölskyldu og vina.
Á jólunum eru gefnar gjafir og þykir sumum margir vera stórtækir í kaupum og jafnvel keyra þar úr hófi fram. Eflaust eru þess einhver dæmi. Kannski mörg. En ég skal játa að mér þótti gott að heyra í fréttum nefndar háar tölur um bókaveltuna fyrir þessi jól. Svo var að skilja að þetta yrðu góð bókajól! Það er held ég séríslenskt; að allir kaupi bækur að gefa og síðan séu þær lesnar á jólunum. Enn eru jólin ekki að fullu gengin í garð þegar þetta er skrifað en ég er þegar með  Péturspostillu (Gunnarssonar) á borðinu og Þú sem ert á himnum, Úlfars Þormóðssonar er þarna líka og svo bætist við... meira um það síðar. En það sem ég hef þegar lesið lofar góðu!
Aftur að gjöfunum -  öðrum en bókum. Einu sinni var með okkur kínverskur maður á jólum. Samstarfsmaður konu minnar. Hann sat í losti á meðan tekið var utan af gjöfunum - við vorum þá mörg í heimili og gestir að auki. Gríðarlegt magn gjafa. Og þarna sat hann þessi gestkomandi maður frá kínverska Alþýðulýðveldinu, agndofa.
En Kínverjinn hugsaði málið og komst að eftirfarandi niðurstöðu. Á jólunum gefa Íslendingar í gjafir það sem þeir ella yrðu að kaupa: Sokka, bindi, úlpur, bolla, skíði, bolta - og bækur. Gott mál sagði Kínverjinn. Og ég er honum sammála. Nytjagjafir á jólum sem auk þess gleðja eru bara til góðs. Bækurnar efla auk þess menninguna, og lyfta andanum. Ekki allar. En vonandi  sem flestar.
Gleðileg jól.