GUÐLAUGUR ÞÓR TEKUR TIL Á ÓHREINA SKOLINU

Guðlaugur Þór fagnaði sínum stærsta kosningasigri um síðustu helgi. Hann er nefnilega að eigin sögn og vina hans, maður sem þorir. Afhroð hans í kosningunum síðustu helgi var vegna þeirra nauðsynlegu ákvarðana sem hann þurfti að taka í embætti sínu sem heilbrigðisráðherra. Hann greindi reyndar ekki frá því að aðgerðaráætlun hefði ekki verið gerð í samráði við „fólkið á gólfinu", enda aukaatriði. Guðlaugur Þór réð nefnilega til sín svokallaða sérfræðinga, og merkilegt nokk voru þeir flestir vinir hans og velgjörðarmenn í pólítik. En Guðlaugur Þór er að eigin sögn strangheiðarlegur og hefur aldrei farið í veiðiferð á annarra kostnað. Hann þarf því ekki að sanna eitt né neitt. Hann er nefnilega líka maður orða sinna. Eftir nokkurra ára starf í íþróttahreyfingunni Fjölni er hann heiðursfélagi félagsins. Heiðraður af vini sínum og velgjörðarmanni. Þann mann réð hann í ráðgjafavinnu hjá heilbrigðisráðuneytinu og reikningurinn hljómaði upp á nokkrar milljónir. Guðlaugur Þór hefur fengið fólk úr eigin vinaranni til að skrifa um sig lofgreinar, um hugrekki hans og athafnir. Hann var í embætti í 20 mánuði og á þeim tíma hrundi íslenska efnahagskerfið. Hann var á vaktinni. Afleiðingin er m.a. sú að skera þarf niður í heilbrigðiskerfinu um tæpa 7 milljarða. Guðlaugur Þór einsetti sér að ekki kæmi til skerðing á þjónustu eða á uppsögnum starfsfólks. Hljómar trúverðugt í kerfi þar sem 80% af kostnaði eru launatengd gjöld! Guðlaugur Þór setti hins vegar á komugjöld og dagdeildargjöld fyrir veikustu sjúklinga landsins. Með því átti að spara 80 til 90 milljónir. Sækja féð til skattborgara landsins sem hafa sjálfir byggt upp velferðarkerfið og hafa í gegnum árin borgað skatta sína í velferðarþjónustuna. Það er vægast sagt vandræðalegt að lesa greinar Guðlaugs Þórs sem hreykir sér af þessum niðurskurði, í nafni Alþjóðagjaldeyrissjóðsins. Nánast eins og það hafi verið happ að fá þetta tækifæri til að skera niður. Í kosningabaráttu síðastliðna viku hefur Guðlaugur Þór skrifað og pantað greinar hjá vinum sínum. Ein þeirra er á heimasíðu hans undir fyrirsögninni „Fyrsti íslenski heilbrigðisráðherrann?". Guðlaugur Þór er maður sem þorir. Hann m.a. „batt enda á alræmdar sumarlokanir á sjúkrahúsum", „kom sjúklingum af göngum Landspítalans", svo vitnað sé í hans eigin orð í auglýsingu á prófkjörsdegi Sjálfstæðisflokksins. Eru engin takmörk fyrir lágkúru sjálfstæðismanna? Það vantar kannski málfarsráðunaut í kosningamaskínu Guðlaugs Þórs. Kæri Ögmundur. Það er gott að vita loksins af hugsjónamanni í heilbrigðisráðuneytinu sem hefur hjartað á réttum stað. Haltu áfram á þinni braut með því að tala við fólk og fá það til samstarfs. Kannski kemur þjóðin einmitt á óvart, Bestu kveðjur,
Starfsmaður á Landspítala