Jón skorar á Davíð!!

Hér með skora ég undirritaður á Davíð Oddsson forsætisráðherra til umræðna á opinberum vettvangi um skattamál. Þar sem ríkissjónvarpið ber hlutleysisreglunni við – að endilega þurfi að draga alls kyns kverúlanta inn í okkar tveggja turna tal - hefi ég samið við sjónvarpsstöðina Omega um beina útsendingu frá fundi okkar sem ég helst mundi vilja að fram færi í Laugardalshöllinni enda má búast við fjölmenni. Þar sem útsendingar Omega ná einungis til Faxaflóasvæðisins tel ég einboðið að við félagarnir gefum fundinn út á myndbandspólu eða á DVD formi til að fullnægja jafnræðisreglu stjórnarskrárinnar og verði þá afurðirnar seldar úti á landi á kostnaðarverði. 

Nú kann að vera að forsætisráðherra, og reyndar þorri þjóðarinnar, þekki mig ekki en öllum til fróðleiks er rétt að ég rifji upp fyrri störf, pólitíska þátttöku, og síðast en ekki síst væntanlegar vegsemdir ef allt fer á besta veg: 

Var sendill hjá Viðtækjaverslun ríkisins 1938-1942
Sölumaður hjá Bifreiðaeinkasölu ríkisins 1942-1946
Háseti á fyrsta nýsköpunartogaranum Ingólfi Arnarsyni í eigu Bæjarútgerðar Reykjavíkur en á móti því happaskipi tók borgarstjórinn okkar, Gunnar heitinn Thoroddsen, í febrúar 1947.
Á Ingólfi var ég lengi, fyrst 1947-1951 Var virkur í verkalýðsarmi Sjálfstæðisflokksins og félagi í Óðni frá 1947
Starfaði á Skömmtunarskrifstofu ríkisins 1952-1953
Aftur háseti á Ingólfi Arnarsyni 1954-1968
Atvinnulaus 1969
Fulltrúi á Skattstofunni í Reykjavík 1970-1985
Starfandi sem sjálfstæður endurskoðandi frá 1986
Sagði skilið við Sjálfstæðisflokkinn 1988
Gekk til liðs við Vinstrihreyfinguna grænt framboð 1999
Hélt mig til hlés í alþingiskosningunum 1999 ef frá er talinn smávægilegur blaðburður fyrir flokkinn í Hlíðahverfi
Sóttist stíft eftir 5. sæti á lista VG í Reykjavík norður í komandi kosningum en var hafnað.
Ömmi frændi eyddi kröfu þar um með því að tala um veðrið og vorið sem fram undan væri - hugsið ykkur bara, að tala um vorið við mann í desember! Og Steingrímur formaður var enn erfiðari við að eiga - yfirgnæfði kröfu mína með háværu rímnavæli sem ég man ekki hvernig hljóðaði að efninu til nema niðurdrepandi viðlagið: “Þiinnnn tímiii muuuun koooooooma ...” 

Þannig fór um sjóferð þá en ég veit hins vegar að VG ætlar mér stórt hlutverk. Þeir halda mér nefnilega heitum forkólfarnir og snúast nú í kringum mig eins og væri ég einhver sólkonungur. Fimmta sætið fékk ég ekki af þeirri einföldu ástæðu að mig skortir að öllu leyti hinn svokallaða “kjörþokka” sem allir flokkar hlaupa nú uppi eins og köttur á eftir mús. En ég er leynivopnið, nokkurs konar Öskubuska, í bakvarðarsveitinni. Ég hef fengið það uppáskrifað úr innstu kreðsum að ég sé burðarásinn í leynilegu skuggaráðuneyti VG. Sú staðreynd hlýtur að duga til þess að forsætisráðherra geri sér grein fyrir alvöru málsins. Það er því að mínu mati einboðið að Davíð Oddsson taki áskorun minni. 
Með vinsemd og virðingu,
Jón Bisnes