LAUNAMENN HLJÓTA AÐ FAGNA

Nú fagna launamenn. Iðnaðarmálagjald stenst ekki ákvæði Mannréttindasáttmála Evrópu: Hluti af duldum sköttum sem launamenn greiða. Launamenn á Íslandi hljóta að fagna því, að ekki er lengur leyfilegt að láta starfsmenn fyrirtækjanna greiða félagsgjöld atvinnurekenda til samtaka atvinnurekenda eins og tíðkast hefur um langt árabil. Ríkið þarf að afnema lög um iðnaðarmálagjald og huga að endurgreiðslu oftekinna gjalda, að mati Einars S. Hálfdánarsonar, hæstaréttarlögmanns og löggilds endur-skoðanda. Hann var lögmaður Varðar Ólafssonar, byggingarmeistara, í máli gegn íslenska ríkinu fyrir Mannréttindadómstóli Evrópu. Því í raun og veru er þessi skattur, eða með réttu félagsgjöld eigenda fyrirtækjanna með þeim hætti að þau taka mið af launagreiðslum og því með réttu skattur sem launamenn borga með vinnu sinni. Með nákvæmlega sama hætti og tryggningagjöldin sem fyrirtækin standa skil á er skattur lagður á laun launamanna til að standa undir félagslega húsnæðilánaskerfinu og atvinnuleysistryggingasjóði. M.ö.o. atvinnurekendur greiða nánast enga skatta og hafa aldrei gert. Eftirleiðis verða atvinnurekendur sjálfir að greiða félagsgjöld sín og óheimilt verður að tengja þau rekstrinum væntanlega. Það er ekki hægt að sjá hvernig þetta mál snertir ríkið. Þetta er bara málefni þessara félagsmanna í samtökum atvinnurekenda. Að þetta skuli hafa viðgengist svona lengi er bara yfirgengilegt og sýnir bara hvað launamenn hafa verið berskjaldaðir gagnvart atvinnurekendum og óvinveittu ríkisvaldi. Jafnvel Hæstiréttur gat ekki varið rétt launamanna að þessu leyti.
Kristbjörn Árnason