LEIÐSÖGUMENN VÍSA VEGINN...

Að mörgu leyti er ég sammála því sem formaður og varaformaður Sjálfstæðisflokksins, þau Geir H. og Þorgerður K. sögðu fyrir síðustu kosningar. Nefnilega að þegar öllu væri á botninn hvolft væri traust efnahagsstjórn brýnt velferðamál. Mér finnst þetta miklu skynsamlegra sjónarmið en við heyrðum frá forsætisráðherranum í vor leið þegar hann lét að því liggja að besta efnahgsráðið væri að gera ekki neitt! Hann fylgdi þeirri hugsun eftir í verki og aðhafðist ekki. Það heitir á fræðimáli að hafa samræmi í teoríu og praxis.
En varðandi efnahaginn og velferðina þá tel ég að traust efnahagsstefna og ábyrgð í velferðarmálum fari saman. Það sé einfaldlega ekki hægt að byggja upp öflugan efnahag án þess jafnframt að tryggja félagslegt réttlæti. Einmitt það hefur verið vanrækt á Íslandi á undanförnum árum.
Menn velta því nú fyrir sér hvort þau Geir H. Og Þorgerður K. ætli að nota sömu slagorðin - og kannski líka sömu plakötin - fyrir næstu kosningar. Það fer eflaust eftir því hve vel þeim þykir hafa tekist til undir þeirra leiðsögn á þessu kjörtímabili og á undangengnum kjörtímabilum sem þjóðin hefur notið leiðsagnar og verkstjórnar Sjálfstæðisflokksins.