LÖG UM SKIPULAGÐA GLÆPASTARFSEMI

Ég legg til að þú beitir þér í stöðu þinni nú fyrir setningu laga um skipulagða glæpastarfsemi og þurfa þau að þekja alla glæpastarfsemi, jafnt skipulagðra glæpahópa sem og pólitískra hópa/flokka, sem meðal annars hafa með glæpum sínum og virðingarleysi við eðlilegt siðferði og lýðræði, velt íslensku efnahagslífi á hliðina og fært heilbrigðis-, mennta-, félags- og löggæslumál og reyndar allt mannlíf til jafns við rekstur í vanþróuðum ríkjum með fjársvelti í nafni sparnaðar. Nauðsyn er að fara vel með fé en landið er komið í flokk með vanþróuðum ríkjum af þessum sökum. Þá ber að benda á að með aðgerðaleysi sínu sé álitamál hvort þingmenn, ráðherrar stjórnendur Seðlabanka Íslands og fjármálaeftirlits sl. 10 árin séu hreinlega hæfir um að bjarga landinu. Það virðist sem allar aðgerðir og mannaráðningar ríkisvaldsins undanfarin misseri stefni eingöngu að því að vernda hagsmuni og völd fjármagnseigenda og fyrri valdaklíkur þessa unga líðræðis. Ísland stendur á brauðfótum hvað flesta hluti varðar og reiði þorra landsmanna eykst stig af stigi. Ég treysti á að þú reynir þitt besta þó ég viti að við ramman er að etja þar sem pólitíkusar hræðast fátt meira en reglu og lagaverk sem treysta lýðræðið og hamla hverskonar fyrirgreiðslu, frændsemis eða flokksgæðingapólitík. Það er heiðarleg og eðlileg krafa fólks þessa lands að heiðarleiki leiki nú um huga og hjörtu þeirra sem taka að sér að ráða fram úr vandanum og gegnsæi, fagmannlegar mannaráðningar hafðar í hávegi en ekki er leitað leiða við að sveigja hjá þeim bestu til starfans eða ráðningalýsingar sniðnar að fyrirframákveðnum kennitölum. Það er einnig heiðarleg krafa þegna þessa lands að ákveðin sé lámarksframfærsluupphæð og hún tryggð öllum þegnunum og að ofurlaunastefna sé aflögð á sama tíma.
Þórður Eric