SAMRÆMD HJÓN - SAMRÆMDAR FRÉTTIR

Smartland Morgunblaðsins segir okkur gleðifréttir af samrýmdum hjónum, fallegu fólki og hamingjusömu. Hamingjuóskir til þeirra. Sunna Karen og Viðar eiga von á barni

Svo kemur í ljós að þau eru ekki bara samrýmd heldur líka samræmd. Hann fréttamaður á Morgunblaðinu sem segir í gær þessa frétt: Hljóta að sjá að ekki sé hægt að stoppa þetta

Og hún fréttamaður á Sjónvarpinu og segir þessa frétt: https://www.ruv.is/sjonvarp/spila/frettir/36973/b0j8ej/netverslun-i-rekkum

Inntak fréttanna er mjög í anda þeirra sem vilja brjóta niður ÁTVR og skeyta engu um hlutverk þeirrar verslunar sem er skýrt í lögum. Það er einnig skýrt hverju læsu barni að lögin eru að engu höfð af hálfu þeirra sem nú setja upp hverja verlsunina á fætur annarri.

Áhorfendur og lesendur eru nánast hafðir að háði. Okkur er sýndur verslunarsalur sem aðeins sé þó «sýningarsalur» og klykkt er út með því að vegna nástöðu við ÁTVR verslun væri rökrétt að loka ÁTVR versluninni!

Greinilegt að miklir fjármunir eru þarna á ferðinni – það segir tæknibúnaðurinn sem sjá má meðal annars.

Allt þetta hefur gerst í skjóli ónýtra stjórnvalda. Að hluta til kann skýringin á aðgerðaleysi stjórnvalda að vera hugleysi en síðan er augljóst að ásetningur hefur verið um að sjá í gegnum fingur sér við lögbrjótana, láta þá vinna verkið í skjóli handlangara sinna á Alþingi og í Stjórnarráðinu.

Nú er spurning hvort nýtt fólk við stjórnvölinn þori að standa í fæturna fyrir hönd almennings og fari að ráði allra lýðheilsustétta landsins sem eru andvígar því að hleypa fjárgróðamönnum í áfengisdreifinguna.

Hvað segir nýr dómsmálaráðherra?

Hvað segir nýr heilbrigðisráðherra?

Hvað segir löggæslan?

-----
Athygli er vakin á því að hægt er að gerast áskrifandi að fréttabréfi þessarar heimasíðu á slóð sem hér er að finna: https://www.ogmundur.is/
Fréttabréfið er sent aðeins endrum og eins til áskrifenda þeim að kostnaðarlausu að sjálfsögðu.