Stríð og friður

Sæll Ögmundur.
Ef mynduð verður vinstristjórn eftir næstu kosningar, myndi VG halda uppi mótmælum gegn stríðsáformum Vesturlanda, og mynduð þið getað starfað í ríkisstjórn sem styddi stríð úti í heimi?
Héðinn Björnsson 

 
Sæll Héðinn.
VG myndi tvímælalaust halda uppi mótmælum gegn stríðsáformum Vesturlanda og ættum við þar samleið með þorrra fólks á Vesturlöndum. Það er athyglisvert að í Evrópu sérstaklega er mjög almenn andstaða hjá almenningi gegn stríðsæsingum ráðamanna. Þú spyrð hvort við gætum starfað innan ríkisstjórnar sem styddi stríð úti í heimi. Ekki treysti ég mér til að gefa alhæfingarformúlu um hvar við kæmum til með að draga línurnar hvað þetta varðar en hitt er víst að við myndum beita okkur af alefli fyrir okkar sjónarmiðum. Við myndum ekki láta sitja við það eitt að andæfa gegn stríði og hvers kyns ofbeldi og yfirgangi. Við myndum að sjálfsögðu vilja að Íslendingar beittu áhrifamætti sínum á erlndum vettvangi til að stuðla að réttlátari heimi en með því móti legðum við okkar á vogarskálar friðsamlegrar sambúðar í heiminum.

Í þessu sambandi langar mig til að snúa yfir á íslensku nokkrum línum úr nýútgefinni bók eftir William Blum sem ágætur félagi minn sendi mér. Bókin heitir "Rogue State" eða "Fanta-Ríkið" (og er þar ekki átt við Írak). : "Væri ég forseti myndi mér takast á fáeinum dögum að stöðva allar  hryðjuverkaárásir og það í eitt skipti fyrir öll. Ég myndi fyrst biðjast afsökunar. Ég myndi beina afsökunarbeiðni minni til ekkna, munaðarleysingja, allra þeirra sem rúnir hafa verið eigum sínum eða orðið fórnarlömb bandarískrar heimsvaldastefnu. Síðan myndi ég í fullri einlægni lýsa því yfir – og láta orð mín berast til allra heimshorna – að íhlutun Bandaríkjanna á heimsvísu væri lokið. ... Síðan myndi ég draga úr hernaðarútgjöldum um 90% og nota það fé sem þannig sparaðist til að greiða fórnarlömbum skaðabætur. Það fé myndi duga vel. Eins árs hernaðarútgjöld sem nema 330 milljörðum dollara samsvara 18 þúsund dollurum á hverja einustu klukkustund sem liðin er allar götur frá dögum Jesú Krists ... Þessar ákvarðanir myndi ég taka fyrstu þrjá daga mína sem forseti. Fjórða daginn yrði ég ráðinn af dögum."

Ekki efa ég að einhverjir vildu ráða slíkan forseta af dögum en hitt er víst að næði sú stefnubreyting sem þarna er boðuð fram að ganga yrði heimurinn friðvænlegri.

Kveðja, Ögmundur